Бэрнар Бэртоса: “У адрозьненьне ад Усьцінава, я не прасіў Барадзіна набыць мне кватэру ў Жэневе” :: Хартыя'97 :: Навiны

Генэральны пракурор кантону Жэневы Бэрнар Бэртоса мае намер утрымаць больш за 200 тысячаў даляраў з сумы закладу, унесенага адвакатамі дзяржсакратара “саюзу” Расеі й Беларусі Паўла Барадзіна. Пра гэта ён паведаміў у інтэрвію “ГаЗеТе”.

Як заявіў жэнеўскі пракурор, у адпаведнасьці зь ягонай пастановай, што ўступілі ў сілу ў мінулы аўторак, з закладу ў 5 млн.франкаў, пад які быў вызвалены Барадзін, будзе вылічана 170 тыс. у лік накладзенага на яго штрафу і 35 тыс. – за сьледчыя вытрымкі.

“Калі Барадзін лічыць сябе невіноўным, то ён меў магчымасьць абскардзіць маё рашэньне за два тыдні. Ён гэтага не зрабіў, значыць, паводле закону Барадзін з рашэньнем пагадзіўся, - сказаў Бэртоса. –Я выдатна разумею, што ў Расеі Барадзін ня можа прызнацца ў адмыцьці грошай, бо тым самым ён прызнаецца ў злачынных махінацыях, зьвязаных з прысваеньнем бюджэтных сродкаў. Вам ён можа казаць усё, што заўгодна, але з сёньняшняга дня Барадзін пастаўлены нак рымінальны ўлік Мінюста Швэйцарыі як асоба, што панесла крымінальнае пакараньне паводле артыкула 305-біс КК – за адмыцьцё грошай”.

Пракурор падкрэсьліў, што калі Барадзіна зноў прыцягнуць да адказнасьці ў Швэйцарыі, “то пакараньне будзе больш жорсткім”.

Акрамя таго, Бэрнар Бэртоса паведаміў журналістам, што канфіскаваныя грошы пойдуць у бюджэт кантону Жэневы. “Я зь іх не атрымаю ні санціма. Я запэўніваю вас, кватэра, дзе я жыву, набывалася за мае грошы, а не на грошы майго падсьледчага. У адрозьненьне ад Усьцінава, я не парсіў Барадзіна набыць мне кватэру ў Жэневе”, - сказаў пракурор.