Выстава “Пагоня” зьведала цэнзуру :: Хартыя'97 :: Навiны

Выстава”Адраджэньне-2002” творчай суполкі “Пагоня” Беларускага саюзу мастакоў, што адкрылася 21 сакавіка ў менскім Палацы мастацтваў, напярэдадні зьведала цэнзуру. Як паведаміў БелаПАН вядомы беларускі мастак Аляксей Марачкін, кіраўніцтва Беларускага саюзу мастакоў і ўлады сталіцы зьнялі творы, якія лічаць крамольнымі.

Сярод іх – праца Валеры Шчаснага, у кампазыцыі якой прысутнічае бел-чырвона-белая стужачка й крыжы, два партрэты Алеся Пушкіна з сэрыі “Беларускае адраджэньне ХХ стагодзьдзя”, а таксама жывапісную працу Алеся Цыркунова, прысьвечаную выдатнаму беларускаму гісторыку Міколе Ермаловічу.

“Зьнялі працу Цыркунува “Здані”, дзе над разбуранымі помнікамі нацыянальнай гісторыі уздымаецца чырвона-зялёны хамут-краты. Праўда, затым гэтае палотнішча дазволілі эскпаніраваць, -- паведаміў Марачкін. – Калі я даведаўся пра адмоўнаке стаўленьне да сваёй працы “Звычайны нацюрморт”, то сам зьняў яго, каб не спакушаць цэнзараў. Такім чынам, мастакі апынуліся ў лядніковым пэрыядзе кантролю над творчым працэса. Прычым цэнзура ажыцьцяўляецца пад добрапрыстойным прадлогам неабходнасьці павышэньня творчага ўзроўню мастацтва. Аднак зьняцьцё прац ніяк не адлюстроўваецца на гэтым працэсе, а толькі абмяжоўвае свабоду самавыказваньня асобы мастака і ягоныя творчыя правы”.

Сваю алегорыю “Звычайны нацюрморт” Марачкін прысьвяціў тэме бульбы й агурка, а таксама хакею з шайбай на пляцоўцы ля сьценаў Маскоўскага крамля. Выстава “Пагоні” прысьвечаная сьвяткаваньню Дня Волі – 84-ай гадавіны абвяшчэньня Беларускай Народнай Рэспублікі.