“Балтика” пакуль ня будзе адзываць інвэставаныя ў “Крыніцу” грошы :: Хартыя'97 :: Навiны

Расейская півавараная кампанія “Балтика” ня будзе “адзываць сродкі”, інвэставаныя ў менскае ААТ “Крыніца”. Пра гэта заявіў 22 сакавка ў Санкт-Пецярбургу генэральны дырэктар кампаніі Таймураз Балоеў, перадае БелаПАН.

Паводле ягоных словаў, “Балтика” зрабіла “значны інвэстыцыйны ўнёсак” у разьвіцьцё “Крыніцы”. Размова йдзе аб пастаўленым абсталяваньні на суму 10,5 млн.даляраў ЗША. Балоеў заявіў, што пакет прапановаў па “Крыніцы” будзе ўзгадняцца кіраўніцтвам “Балтики”напрацягу месяца. На дадзены момант, паводле інфармацыі генэральнага дырэктара, ягонаму прадпрыемству належыць 10 адсоткаў беларускага піўнога рынку.

Балоеў падкрэсьліў, што кіраўніцтву кампаніі да гэтага часу невядомыя прычыны, паводле якіх адбыўся збой у рэалізацыі праекту. У сярэдзіне лютага ААТ “Піваваранная кампанія “Балтика” зьвярнулася ў міжнародны камэрцыйны Арбітражны суд пры гандлёва-прамысловай палаце Расеі з зыскам супраць “Крыніцы”. “Балтика” запатрабавала ад беларускага ўраду вярнуць 10,5 млн.даляраў ЗША, інвэставаных у рэканструкцыю заводу, бо ўрад ужо некалькі месяцаў не дае ніякага адказу на прапановы расейцаў правесьці дадатковую эмісію акцыяў “Крыніцы” для атрыманьня ейнага кантрольнага пакету. За два гады плянавалася ўнесьці ў завод 50 млн.даляраў і тым самым падвоіць ейную магутнасьць.

21 сакавіка на сэмінары кіруючых работнікаў арганаў улады Аляксандар Лукашэнка зноў заявіў, што”Балтыка” не захацела выканаць “некаторыя ўмовы”, закладзеныя ў 12 пунктаў інвэстыцыйнага праекту.