Масква можа адмовіцца ад паставак беларускага харчаваньня :: Хартыя'97 :: Навiны

Бязвынікова завяршыліся перамовы ў Менску па пытаньні цэнтралізаванага экспарту ў Маскву беларускага харчаваньня. Перамовы вялі прадстаўнікі Міністэрства сельскай гаспадаркі й харчаваньня Беларусі й дэлегацыя ўраду Масквы. Бакі плянавалі зацьвердзіць сьпіс паставак у расейскую сталіцу прадуктаў харчаваньня беларускай вытворчасьці, паведамляе ІА “Росбалт”.

Нагадаем, двухбаковае супрацоўніцтва ідзе з 1997 году, калі ўрад Беларусі й Масквы падпісалі шматгадовае пагадненьне аб разьвіцьці замежнаэканамічных стасункаў у галіне паставак харчаваньня й тавараў народнага спажываньня. У час візыту ў Маскву міністра сельскай гаспадаркі й харчаваньня Міхаіла Русага, што адбыўся ў канцы мінулага году, бакі дасягнулі папярэдняй дамоўленасьці аб пастаўках ў 2002 годзе 17,5 тыс.тонаў мяса, 6 тыс.тонаў сьметанковага масла, 5 тыс.тонаў сухога малака, 12 млн.умоўных банак малочных кансэрваў, 4 тыс.тонаў цьвёрдых сыроў, 10 тысячаў тонаў бульбы, 5 тыс. тонаў агародніны, 30 тыс.тонаў солі. У час візыту масквічоў плянавалася зацьвердзіць гэты сьпіс і падпісаць дадатак да пагадненьня (кантракт) агульнай вартасьцю ў 50-60 млн.даляраў.

Аднак партнёры не прыйшлі да ўзаемапаразуменьня. Прадстаўнікі маскоўскага ўраду адмовіліся камэнтаваць журналістам прычыны рознагалосьсяў. Паводле зьвестак беларускага боку, масквічы ўзялі “тайм-аўт” на роздум. У прыватнасьці, як заявіў карэспандэнту ІА “Росбалт” дырэктар дэпартамэнту Мінсельгасхарчу Беларусі Аляксандар Папкоў, “расейцы зьбіраюцца дома абдумаць і абгрунтаваць атрыманую тут інфармацыю”.

Як стала вядома зь неафіцыйных крыніцаў, дэлегацыя ўраду Масквы засталася незадаволенай беларускімі коштамі. Справа ў тым, што за апошні год у Беларусі адзначаны істотны рост коштаў на харчовыя тавары, якія вышэй за расейскія, у прыватнасьці, коштаў на маскоўскім харчовым рынку.