Прыватызацыя “Белшыны” адкладаецца :: Хартыя'97 :: Навiны

На прадпрыемстве не ўклаліся ў графік акцыянаваньня. А калі б усё ішло згодна пляну, то да 18 сакавіка камісія па прыватызацыі павінна была падрыхтаваць “прыватызаваны” пакет дакумэнтаў, паведамляе “БДГ”.

Перад камісіяй стаяла сапраўды нялёгкая задача, - за месяц зь невялікім вызначыць кошт аб’ектаў вялізнага прадпрыемства, правесьці на ім поўную інвэнтарызацыю. І у выніку назваць “свой” кошт маёмасьці (балянсавы яго кошт раней складаў 210 млрд. беларускіх рублёў). Але з пастаўленай задачай камісія ў тэрмін не справілася. Ёй далі адтэрміноўку на два тыдні. Напэўна, у сувязі з гэтым “маўчыць” і адзін з магчымых інвэстараў – французская фірма “Мішлен” (найбуйны вытворца шынаў у Эўропе), высокапастаўленыя прадстаўнікі якой ў сярэдзіне лютага пабывалі на “Белшыне”.

Між тым сытуацыю на камбінаце спрыяльнай назваць нельга. Ужо два месяцы як работнікі прадпрыемства атрымоўваюць так званы “кошык”, той мінімум, які ў грашовым выяўленьні складае ад 60 да 90 тысячаў беларускіх рублёў. Але і “кошык” на камбінаце затрымліваюць. Адным – на два тыдні, іншым – на чатыры. Для работнікаў заводу, якія традыцыйна лічыліся адным з самых высокааплочваемых катэгорыяў, такое становішча цяжкае як у матэрыяльных, так і маральных адсносінах. А БКШ “Белшына” – горадаўтваральнае прадпрыемства. На ім працуе 14,5 тысячаў чалавек. І гарадзкі бюджэт больш чым на 40 адсоткаў фармуецца за кошт падаткавых паступленьняў з камбінату.