Улады Беларусі афіцыйна прызналі Прыднястроўе :: Хартыя'97 :: Навiны

Лідэр Прыднястроўя Ігар Сьмірноў прызначыў былога віцэ-прэзыдэнта непрызнанай рэспублікі Аляксандра Карамана паўнаважаным прадстаўніком у Беларусі. Новая пасада ўключаная ў штатны расклад адміністрацыі прэзыдэнта непрызнанай ПМР. У паўнаважанага прадстаўніка ў Беларусі будзе ранг міністра. Раней былы міністар сувязі й тэлекамунікацыяў Барыс Акулаў быў прызначаны паўнаважаным прадстаўніком на Ўкраіне. Аднак МЗС Украіны заявіў аб тым, што ня мае намеру прыняць прадстаўніка непрызнанай ПМР.

Паказальна, што афіцыйны Менск лічыць Прыднястроўскую Малдоўскую Рэспубліку паўнапраўнай дзяржавай. Паводле зьвестак шматлікіх крыніц, Прыднястроўе зьяўляецца перавалачным пунктам для беларускай зброі. У брытанскім друку зьяўляліся матэрыялы аб транзыце беларускай зброі на Блізкі Ўсход. Згодна аўтарытэтным дадзеным, рэспубліка ўваходзіць у першую дзясятку сусьветных экспартэраў узбраеньняў і тым самым прыцягвае пільную ўвагу Захаду, у першую чаргу з-за падзеяў 11 верасьня. Брытанскія журналісты намалявалі праўдзівую схему транзыту сьмерцяноснага грузу з кантынентальнай Беларусі ў міжземны рэгіён. Перавалачным пунктам называлася Прыднястроўская Малдоўская Рэспубліка – непрызнанае афіцыйна ўтварэньне на тэрыторыі Малдовы.

Брытанцы называюць Прыднястроўе “эканамічнай чорнай дзіркай”, дзе зьнікае ўсё, ад нафты да цыгарэт. Прыводзяцца наступныя дадзеныя расьследаваньняў: восеньню мінулага году ў Прыднястроўі было канфіскавана амаль 400 падробленых пячатак Рэспублікі Малдова, а затрыманы галоўны мытнік Тыраспалю хтосьці сп.Сьмірноў аказаўся сынам самаабвешчанага прэзыдэнта Прыднястроўя Ігара Сьмірнова.