Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
У Беларусі ў месцах пазбаўленьня волі на дадзены час знаходзіцца 42 тысячы злачынцаў, а выпраўленчыя ўстановы краіны перапоўненыя на 37%. Пра гэта ўчора вечарам на пленуме Вярхоўнага суда Беларусі паведаміў міністар унутраных справаў Ўладзімер Навумаў.
Нядаўна амаль у кожнага зь іх была службовая машына, вялікі габінэт, сакратарка (а то і не адна), урадавая сувязь і іншая атрыбутыка, патрэбная высокапастаўленым службовым асобам. Пасьля іх усіх “папрасілі”. Кагосьці з публічным скандалам, кагосьці ветліва і нібыта па ўласным жаданьні. Сёньня ўсе яны з прыстаўкай “экс”. Аднак далёка ня ўсе шчасьлівыя й працаўладкаваныя.
Актывісты руху ЗУБР Максім Дварэцкі і Андрэй Зайцаў былі затрыманыя ў Магілёве ноччу 26 сакавіка за маляваньне ў цэнтральнай частцы гораду графіці “Так жыць нельга!”. Перад затрыманьнем адбыўся дзіўны інцыдэнт. Пасьля таго, як зубры зрабілі чарговы надпіс, да іх падыйшлі двое нецьвярозых хлопцаў і справакавалі бойку. Патасоўку спыніла міліцыя. Усіх чацьвярох даставілі ў аддзяленьне. Пасьля разьбіральніцтваў, міліцыянты адпусьцілі пачынальнікаў бойкі, а зуброў пратрымалі да раніцы.
Журналісты закрытай уладамі гарадзенскай недзяржаўнай газэты “Пагоня” Мікалай Маркевіч і Павал Мажэйка зьвярнуліся да кіраўнікоў буйных краін сьвету з заклікам не дапусьціць расправы над імі. Нагадаем, што пракуратура Беларусі вылучыла супраць журналістаў абвінавачаньне ў паклёпе на прэзыдэнта Рэспублікі Беларусь. Журналісты сьцьвярджаюць, што гэтае абвінавачваньне не абапіраецца ні на факты, ні на заканадаўства краіны. Яны зьвяртаюць увагу, што Беларусь – адзіная краіна ў Эўропе, дзе існуе крымінальны перасьлед па справах такога кшталту. П.Мажэйка і М.Маркевіч зьвяртаюцца да прэзыдэнтаў Літвы Валдаса Адамкуса, ЗША Джорджа Буша, Латвіі Вайры Віке-Фрэйбэрга, кіраўнікоў Польшчы, Вялікабрытаніі, Украіны, Расеі з просьбай выкарыстаць свой аўтарытэт і спыніць расправу над журналістамі.
Толькі да 15 красавіка вытворчыя аб’яднаньні “Белшына” (Бабруйск), “Азот” (Горадня), “Палімір” (Наваполацак) і “Хімвалакно” (Сьветлагорск) могуць стаць акцыянэрнымі таварыствамі. Як паведаміў журналістам прэзыдэнт канцэрну “Белнафтахім” Іван Бамбіза, пра гэта заявілі на паседжаньні прэзыдуюму Савету міністраў Беларусі, на якім абмярковаліся пытаньні акцыянаваньня прадпрыемстваў нафтахімічнай галіны.
Федэрацыя незалежных прафсаюзаў Расеі зь непакоем успрымаюць інфармацыю аб спадзе жыцьцёвага ўзроўню насельніцтва Беларусі. Пра гэта гаворыцца ў распаўсюджаным ФНПР у Менску ў сувязі з парушэньнем правоў беларускіх прафсаюзаў тэксьце заявы “Аб сытуацыі ў Рэспубліцы Беларусь”. Як падкрэсьліваецца ў заяве, ФНПР у знак салідарнасьці зь беларускімі прафсаюзамі прыняла рашэньне “наладзіць 28 сакавіка 2002 году пікетаваньне амбасады Рэспублікі Беларусь у Маскве й прадстаўніцтваў Рэспублікі Беларусь у Мурманску, Екацерынбургу, Санкт-Пецярбургу, Навасібірску, Краснадары, Калініградзе й Цюмені”.
Берасьцейскі гарвыканкам не дазволіў “пярвічцы” Свабоднага прафсаюзу Беларускага работнікаў Берасьцейскага дзяржунівэрсытэту імя А.С.Пушкіна й Берасьцейскай гарадзкой арганізацыі Беларускай сацыял-дэмакратычнай партыі (НГ) правядзеньне 28 сакавіка мітынгу на стадыёне “Будаўнік” пад лёзунгамі прафсаюзаў.
За першую палову сакавіка кошты ў Беларусі вырасьлі на 1,4 адсоткі. Усяго з пачатку году кошты павялічыліся на 11%. Нацыянальны банк Беларусі і Савет міністраў разьлічваюць, што інфляцыя сёлета будзе ня больш за 20-27 адсоткаў.
, iнформэр
