Усё большая колькасьць беларусаў мяркуе, што яны жывуць горш за расейцаў :: Хартыя'97 :: Навiны

Усё большая колькасьць беларусаў пачынаюць меркаваць, што жыхары іхнай краіны жывуць горш за расейцаў. Да такой высновы прыйшлі спэцыялісты Медыягрупы “Союз” і групы кампаніяў monitoring.ru у выніку сацыялягічных апытаньняў, праведзеных у лютым 2002 г. На пытаньне, хто жыве лепей, 47% рэспандэнтаў у Беларусі адказалі, што расейцы. Год таму на гэтае пытаньне адказ давалі 41% апытаных. У Расеі 56% насельніцтва лічаць, што яны жывуць горш за беларусаў. Год таму так меркавала 52% расейцаў.

У той самы час толькі 12% расейскіх грамадзян мяркуюць, што ў Беларусі жыць лепей. Зь мінулага году колькасьць такіх людзей вырасла на 1%. У самой Беларусі 17% жыхароў мяркуюць, што жывуць лепей за расейцаў, а год таму так думалі 22% жыхароў. У тым, што ў абедзьвюх краінах жывеца аднолькава, упэўненыя ў Расеі 22%, а ў Беларусі 29% грамадзян. Летась так меркавалі 25% расейцаў і 24% беларусаў. Цяжка было адказаць на гэтае пытаньне 10% апытаных у Расеі і 7% у Беларусі. Пры гэтым летась такіх было 13% беларускіх рэспандэнтаў і 12% расейскіх.

Дасьледаваньні праводзіліся мэтадам асабістага фармалізаванага інтэрвію па месцу жыхарства й фокус-групавых дыскусіяў. Было апытана 2026 рэспандэнтаў у Расеі й 605 у Беларусі, праведзена па 2 фокус-групы ў Маскве і ў Менску. Геаграфічны ахоп апытаньня – сем федэральных акругаў Расейскай Федэрацыі й шэсьць абласьцей Рэспублікі Беларусь.