Арыштаваны кіраўнік гарадзенскага аддзяленьня БНФ :: Хартыя'97 :: Навiны

Судзьдзя Ленінскага раённага суда Горадні Зьміцер Дземчанка пастанавіў асудзіць да адміністратыўнага арышту на 10 сутак кіраўніка гарадзенскага аддзяленьня партыі БНФ Сяргея Мальчыка. Судзьдзя палічыў яго віноўным у актыўным удзеле ў несанкцыянаваным мітынгу й шэсьці, якія адбыліся ў Горадні 24 сакавіка з нагоды Дня Волі –84-й гадавіны абвяшчэньня Беларускай Народнай Рэспублікі. Сяргей Мальчык у знак пратэсту супраць рашэньня суда аб’явіў галадоўку, паведамляе БелаПАН.

Раней пастанова аб 10-суткавым арышце за актыўны ўдзел у мітынгу й шэсьці была вынесена адносна лідэра гарадзенскага аддзяленьня незарэгістраванага аб’яднаньня “Малады Фронт” Вадзіма Саранчукова. Аднак ён знаходзіцца за межамі Горадні і таму пакуль застаецца на свабодзе.

Акрамя таго, у папярэднія дні да розных адміністратыўных пакараньняў былі падвергнутыя іншыя гарадзенскія апазыцыянэры. Суд прызнаў віноўным у арганізыцыі несанкцыянаваных мерапрыемстваў апазыцыі актывіста БНФ Мікалая Лемяноўскага й пастанавіў аштрафаваць яго на 150 мінімальных заробкаў. Віктар Сазонаў зь Беларускай сацыял-дэмакратычнай Грамады атрымаў штраф у памеры 20 мінімальных заробкаў, а кіраўнік “Маладой Грамады” Сьвятлана Нех аштрафаваная на 50 мінімальных заробкаў. Папярэджаньні вынесеныя тром удзельнікам акцыі – Максіму Лебядзеву, Міхаілу Патрэбе, Раману Рамашку.

8 красавіка ў Горадні будуць разглядацца справы намесьніка Партыі БНФ Юры Хадыкі й яе актывіста, былога старшыні Сялянскай партыі Яўгена Лугіна. Яны таксама прымалі ўдзел у мітынгу й шэсьці й былі затрыманыя міліцыяй.