Вы находитесь на старой версии сайта "Хартия'97 - Новости Беларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
У Менску была затрыманая здымачная група НТВ, якая здымала ля будынку адной зь менскіх калёніяў на вуліцы Кальварыйскай. Здымачная група НТВ у момант затрыманьня брала інтэрвію ў жонкі былога рэктара Гомельскага мэдычнага інстытута Юры Бандажэўскага, які ўтрымліваецца ў гэтай калёніі. Па абвінавачваньню ў хабарніцтве ён быў асуджаны да васьмі гадоў турмы. Дырэктар прадстаўніцтва НТВ ў Менску Павал Селін, апэратар Канстанцін Марозаў і асыстэнт Зьміцер Давыдзенка вымушаныя былі даць пісьмовыя тлумачэньні датычна відэаздмак, пасьля чаго іх адпусьцілі.
Суд Цэнтральнага раёну Менску вынес сёньня пастанову аштрафаваць каардынатара Хартыі’97 Зьмітра Бандарэнку на суму ў 20 мінімальных заробкаў (200 даляраў ЗША) за ўдзел у мірнай акцыі апазыцыі ў Дзень Волі 24 сакавіка. Зьмітра Бандарэнку прызналі віноўным у парушэньні артыкула 167.ч.1 КаАП (удзел у несанкцыянаваных грамадзкіх мерапрыемствах, мітынгах, шэсьцях).
Удзельнікам пікету ў абарону журналістаў газэты “Пагоня”, які меў учора ў Горадні, вынесеныя папярэджаньні. Гэта настаўнік гісторыі Алесь Дзянісаў, студэнт Зьміцер Дулько, Станіслаў Пачабут – журналіст газэты “Навінкі”, каваль Зьміцер Антаневіч, рабочы аб’яднаньня “Азот” Павал Касьпяровіч і беспрацоўны Ільля Пячынін.
З 1 красавіка шэрагу краін Эўразьвязу забаранілі прымаць самалёты, якія не адпавядаюць міжнародным патрабаваньням па ўзроўні шуму й экалягічнай бясьпекі. Сярод нацыянальных авіякампаніяў найбольш пацярпелых ад абмежаваньняў і беларуская “Белавія”. Спэцыялісты тлумачаць сытуацыю нежаданьнем беларускіх уладаў набываць тэхніку сусьветных лідэраў авіябудаваньня і арыентацыяй выключна на расейскіх вытворцаў. З усіх бартоў нацыянальнага авіяпарку толькі чатыры самалёты Ту-154М адпавядаюць патрабаваньням Міжнароднай арганізацыі грамадзянскай арганізацыі (ІКАО) па ўзроўні шуму. Гэтыя абставіны істотна паўплываюць на працу кампаніі “Белавія”, сьцьвярджае Радыё Свабода.
Рэдакцыя недзяржаўнай беларускай газэты “Белавежская пушча” зьвярнулася да грамадзкай арганізацыі “Экаправа” з просьбай падтрымаць выданьне ў абароне ягоных правоў, якія парушаюцца адміністрацыяй прэзыдэнта.
У сакавіку 2002 году ў Беларусі працягваўся рост тарыфаў на жыльлёва-камунальныя паслугі для насельніцтва. Зноў рэзка павялічылася квартплата (плата за тэхабслугоўваньне, калі кватэра прыватызаваная) - на 43,8 адсоткі (з 22,43 да 32,26 рублёў за квадратны мэтар агульнай плошчы), пры тым, што яна ўжо павялічвалася на 82,2 адсоткі.
Суд Цэнтральнага раёну Менску асудзіў актывіста руху ЗУБР Цімафея Дранчука да 10 сутак арышту за ўдзел у мірнай акцыі ў Дзень Волі. Актывіст ЗУБРа прызнаны віноўным у парушэньні арт.167 ч.2 КаАП (парушэньне парадку арганізацыі правядзеньня і арганізацыі мітынгаў, грамадзкіх мерапрыемстваў). Прысуд суда быў зачытаны ў адсутнасьці абвінавачанага.
Адмена сьмяротнага пакараньня, вызваленьне палітычных апанэнтаў рэжыму, пашырэньне правоў парлямэнту, зьмена выбарчага заканадаўства – вось асноўныя патрабаваньні, якія Беларусь павінна выканаць для нармалізацыі стасункаў з Радай Эўропы. Пра гэта гаворыцца ў адмысловай заяве дэпутата германскага бундэстага, дарадцы Рады Эўропы па справах Беларусі Вольфганга Бэрэндта. Заява зроблена ў сувязі з вызваленьнем дэпутата Вярхоўнага савету 13-га скліканьня Андрэя Клімава й распаўсюджана па каналах нямецкіх інфармацыйных агенцтваў. З заявы вынікае, што пакуль для Эўропы застаецца незразумелым, ці зьяўляецца вызваленьне Клімава пачаткам палітычных зьменаў у Беларусі ці гэта толькі адзінкавы пазытыўны крок.
Аб праекце Дзяржаўнай праграмы па ўзмацненьні барацьбы з карупцыяй і хабарніцтвам, а таксама аб выніках калегіі, праведзенай у рэспубліканскай пракуратуры па пытаньнях эфэктыўнасьці выяўленьня Міністэрствам унутраных справаў, камітэтам дзяржаўнай бясьпекі й дэпартамэнтам фінансавых расьсьледаваньняў камітэту дзяржаўнага кантролю фактаў карупцыі ў мытных органах і органах выканаўчай улады даклаў учора Аляксандру Лукашэнку генэральны пракурор Беларусі Віктар Шэйман. Кіраўнік дзяржавы запатрабаваў ад генпракурора ўзмацніць кантроль за законнасьцю дзейнасьці кіраўнікоў арганізацыяў усіх узроўняў, патрабаваць поўнага спагнаньня матэрыяльнага ўрону, нанесенага нядбайнасьцю, нямэтавым выкарыстаньнем бюджэтных і крэдытных сродкаў.
Крымінальная справа адносна двух афіцэраў міліцыі, датычных да трагедыі на Нямізе ў Менску 30 траўня 1999 году, спыніў суд Цэнтральнага раёну Менску. Судзьдзя Пётра Кіркоўскі спыніў справу з прычыны сканчэньня тэрміну даўнасьці. Намесьніка начальніка міліцыі грамадзкай бясьпекі Віктара Русака й начальніка аддзелу масавых мерапрыемстваў Міхаіла Кандраціна абвінавачвалі ў службовай нядбайнасьці, у выніку якой на станцыі мэтро “Няміга” у сталіцы тры гады таму загінула 53 чалавекі, а больш за 200 было паранена.
Падчас свайго апошняга візыту ў Тэгеран міністар замежных справаў Беларусі быў прыняты прэзыдэнтам Ірану Мохамадам Хатамі. Міхаіл Хвастоў перадаў яму ліст Аляксандра Лукашэнкі, падкрэсьліваючы важнасьць разьвіцьця дыялёгу паміж дзьвюма краінамі на вышэйшым узроўні. Лукашэнка запрасіў Хатамі наведаць Беларусь з афіцыйным візытам. Прэзыдэнт Ірану пацьвердзіў гатоўнасьць нанесьці афіцыйны візыт у Беларусь.
Аляксандар Лукашэнка выдаў Указ “Аб падпісаньні Крэдытнага пагадненьня паміж Рэспублікай Беларусь і Кувэйцкім фондам арабскага эканамічнага разьвіцьця”. Згодна дакумэнту плянуецца прадстаўленьне Беларусі доўгатэрміновага ільготнага крэдыту ў памеры 5,1 мільёнаў кувэйцкіх дынараў (каля $16,5 млн.). Грошы пойдуць на фінансаваньне праекту рэканструкцыі заводу поліэфірных тэкстыльных ніцяў прадпрыемства “Сьветлагорскае вытворчае аб’яднаньне “Хімвалакно”.
Міністэрства сувязі Беларусі аб’явіла аб павелічэньні ў красавіку коштаў на свае паслугі. Робіцца гэта для таго, каб дапамагчы большасьці раённых прадпрыемстваў сувязі, якія зьяўляюцца стратнымі. Тарыфы на паслугі вырастуць да 10%. Павышэньне коштаў тлумачыцца таксама і тым, што ў Беларусі самыя нізкі кошты на паслугі электрасувязі сярод краін СНД. Напрыклад, абаненцкая плата ў Беларусі не мянялася са сьнежня мінулага году й скаладае 684 беларускіх руб.(менш 0,5$), адзначылі ў міністэрстве.
, iнформэр
