Рада Эўропы да вызваленьня Андрэя Клімава паставілася зь недаверам :: Хартыя'97 :: Навiны

Адмена сьмяротнага пакараньня, вызваленьне палітычных апанэнтаў рэжыму, пашырэньне правоў парлямэнту, зьмена выбарчага заканадаўства – вось асноўныя патрабаваньні, якія Беларусь павінна выканаць для нармалізацыі стасункаў з Радай Эўропы. Пра гэта гаворыцца ў адмысловай заяве дэпутата германскага бундэстага, дарадцы Рады Эўропы па справах Беларусі Вольфганга Бэрэндта. Заява зроблена ў сувязі з вызваленьнем дэпутата Вярхоўнага савету 13-га скліканьня Андрэя Клімава й распаўсюджана па каналах нямецкіх інфармацыйных агенцтваў. З заявы вынікае, што пакуль для Эўропы застаецца незразумелым, ці зьяўляецца вызваленьне Клімава пачаткам палітычных зьменаў у Беларусі ці гэта толькі адзінкавы пазытыўны крок.

Вольфганг Бэрэндт вітае вызваленьне Андрэя Клімава, але ў той самы час адзначае, што яно азмрочана шэрагам абставінаў. Паралельна с вызваленьнем аднаго апанента рэжыму за ўдзел у хоць і несанкцыянаваных, але мірных вулічных шэсьцях, былі затрыманыя й дастаўленыя ў турмы дзясяткі іншых апанентаў. Усё гэта – прыклад старой вядомай палітыкі – крок наперад, два крокі назад.

Гэта датычыць і працэсу над выкрадальнікамі й забойцамі апэратара ОРТ Зьмітра Завадзкага. Пазытыў у тым, што ня быў вынесены сьмяротны прысуд, а негатыў у тым, што Менск па-ранейшаму не пайшоў на сустрэчу патрабаваньням Захаду адносна высьвятленьня прычынаў зьнікненьня Завадзкага. Судовыя паседжаньні, насуперак міжнародным нормам, праходзілі за зачыненымі дзьвярыма.

Эўрапейскі парлямэнтар заклікае заходніх палітыкаў зьвярнуць увагу на надыходзячыя ў красавіку паседжаньні беларускага “парлямэнту”. На іх павінны абмяркоўвацца новыя заканадаўчыя акты. Сярод якіх пашырэньне правоў парлямэнту, новы закон аб СМІ.

Некаторыя заходнія палітыкі й палітолягі па-ранейшаму выказваюць надзеі на фактар расейскага ўплыву на палітычны курс беларускага кіраўніцтва. Як піша на старонках нямецкага Die Welt вядомы амэрыканскі палітычны дзеяч, а зараз выкладчык Унівэрсытэту Джона Гопкінса ў Вашынгтоне Зьбігнеў Бжэзінскі, “у сувязі з тым, што Расея мае моцны ўплыў на Беларусь, Маскве варта было б садзейнічаць дэмакратычнаму пераходу Беларусі да сапраўднай незалежнасьці. Архаічны нэасавецкі рэжым Лукашэнкі павінен вызваліць месца сапраўднай дэмакратыі”, -- паведамляе Радыё Свабода.