У Менску затрымалі здымачную групу НТВ :: Хартыя'97 :: Навiны

У Менску была затрыманая здымачная група НТВ, якая здымала ля будынку адной зь менскіх калёніяў на вуліцы Кальварыйскай. Здымачная група НТВ у момант затрыманьня брала інтэрвію ў жонкі былога рэктара Гомельскага мэдычнага інстытута Юры Бандажэўскага, які ўтрымліваецца ў гэтай калёніі. Па абвінавачваньню ў хабарніцтве ён быў асуджаны да васьмі гадоў турмы. Дырэктар прадстаўніцтва НТВ ў Менску Павал Селін, апэратар Канстанцін Марозаў і асыстэнт Зьміцер Давыдзенка вымушаныя былі даць пісьмовыя тлумачэньні датычна відэаздмак, пасьля чаго іх адпусьцілі.

Як паведаміў прэсаваму цэнтру Хартыі дырэктар прадстаўніцтва НТВ Павал Селін, здымачная група мела намер узяць інтэрвію у Галіны Бандажэўскай ля сьцен калёніі, бо жанчына прыехала з Гомлі на сустрэчу з мужам. Як сьцьвярджае Павал Селін, відэакамера “разважліва” была накіраваная ў супрацьлеглы ад калёніі бок вуліцы, і наогул здымка праходзіла 150 мэтрах ад плоту турмы. Аднак у той момант, калі апэратар здымаў Галіну Бандажэўскую, якая накіроўвалася да брамы калёніі, да супрацоўнікаў НТВ выйшаў намесьнік начальніка калёніі падпалкоўніка Лось. Ён забраў у журналістаў дакумэнты і выклікаў міліцыю.

Супрацоўнікі Фрунзенскага РУУС, што прыехалі ў калёнію, выказалі намер сканфiскаваць у здымачный групы апаратуру. Калi ж журналiсты катыгарычна адмовiлiся аддаць сваю тэхнiку, мiлiцыянты паабяцалi выклікаць супрацоўнікаў КДБ і тыя, маўляў, “дакладна разьбяруцца як трэба”. Аднак на справе ўсё абмежавалася дачай пісьмовых тлумачэньняў і журналісты праз гадзіну пасьля затрыманьня, нарэшце, былі адпушчаныя. Павал Селін, камэнтуючы прэсаваму цэнтру Хартыі дадзены інцыдэнт, саркастычна адзначыў, што ён “рады за тое, якім чынам распрацаваная сыстэма аховы ў беларускіх калёніях. Ад яе ніхто не схаваецца. Ні той, хто знаходзіцца па той бок плоту, ні той, хто па гэты...”