Бацька Андрэя Зайцава працягвае высьвятляць абставіны сьмерці сына :: Хартыя'97 :: Навiны

Тры месяцы бацька памерлага Андрэя Зайцава – Юры Зайцаў і ягоны гомельскі адвакат Дзьмітры Іванішка імкнуцца высьветліць усе абставіны сьмерці Андрэя. Аднак іх спробы атрымаць інфармацыю натыкаюцца на адмову ці маўчаньне афіцыйных структураў. Затое, як паведамляеРадыё Свабода, не маўчаць сьведкі.

Адразу пасьля сьмерці Андрэя Зайцаў-старэйшы зьвяртаўся ва ўправу КДБ з патрабаваньнем даць адказ, хто з супрацоўнікаў управы вэрбаваў яго сына Андрэя у сакрэтныя інфарматары. Управа КДБ перадала заяву ў пракуратуру Савецкага раёну, якая нібыта высьвятляла прычыну сьмерці 24-гадовага Андрэя.

Пракуратуру, аднак, не цікавілі абставіны вэрбоўкі супрацоўнікам УКДБ Зайцава-малодшага. Яна не знайшла падставаў для ўзбуджэньня крымінальнай справы з прычыны давядзеньня Андрэя да самагубства.

Зайцаў-старэйшы і ягоны адвакат Іванішка падалі пазоў у суд Савецкага раёну, але і суд ня стаў разглядаць справу. Спаслаўся на непадведамаснасьць.

Пазоўшчыкі падалі скаргу ў абласны суд. Тэрмін скончыўся, аднак адказу няма.

Вайсковы камісарыят, дзе Андрэй сустракаўся з супрацоўнікам УКДБ, даслаў адпіску: маўляў, бяз позвы нельга высьветліць, хто выклікаў Адрэя ў камісарыят.

Адвакат Іванішка зрабіў таксама запыт у “Гомельаблтэлеком” яшчэ 10 студзеня, каб высьветліць, каму менавіта належаў тэлефон і пэйджэр, якія атрымаў Андрэй для сувязі. Адказу дагэтуль няма. Ен вымушаны зараз зрабіць паўторны запыт і даслаць заказным лістом.

Адначасова Дзьмітры Іванішка пачаў праводзіць апытаньні сьведкаў, каб запісаць іх і ўсё-такі прымусіць пракуратуру ўзбудзіць крымінальную справу пра давядзеньне Зайцава да самагубства. У прыватнасьці, гомелец Андрэй Толчын засьведчыў, што асабіста дапамагаў Зайцаву запісаць на аўдыастужку размову з супрацоўнікам УКДБ.