Гомельскія прадпрыемствы адпраўляюць рабочых у доўгатэрміновыя неаплочваемыя адпачынкі :: Хартыя'97 :: Навiны

На Гомельшчыне ўсё больш прадпрыемстваў адпраўляюць сваіх работнікаў у доўгатэрміновыя неаплочваемыя адпачынкі. Больш за 1000 работнікаў тлушчавага камбінату “адпачываюць” ужо тры месяцы. Гэта вымушаны, неаплочваемы адпачынак. Нядаўна на паседжаньні аблвыканкаму новае кіраўніцтва прадпрыемства прапанавала праграму выхаду з крызы. На гэта згодна падлікам спатрэбіцца 2,5 гадоў й 250 мільёнаў рублёў, неабходных для запуску вытворчасьці. Але паколькі на рахунку прадпрыемства грошай няма, а ёсьць толькі 20-мільярдавая крэдыторская запазычанасьць, то фінансавую падтрымку яму паабяцаў аказаць Гомельскі аблвыканкам. Канчатковы лёс прадпрыемства павінен вырашыцца на ўзроўні ўраду, перадае praca.by.

На Гомельскім заводзе “Крышталь”, як паведамляе “БДГ”, такі самы вымушаны адпачынак калектыву быў спынены: з Расеі нарэшце паступілі алмазы для апрацоўкі. Аднак прысланай колькасьці сыравіны хапіла толькі на два тыдні працы. І зноў прадпыремства застыла ў чаканьні, калі ж на міжурадавым узроўні дзьвюх краін вырашыцца пытаньне аб рэгулярнай пастаўцы алмазаў. Перашкодаю, як высьветлілася, сталі ўмовы аплаты ПДВ, якія робяць нявыгаднымі для кампаніі “АлРосса”, нягледзячы на падпісаную дамову, на пастаўку якуцкіх алмазаў на гомельскі “Крышталь”.

І зусім нядаўна да ліку “адпачываючых” не па сваім жаданьні далучыўся амаль палутаратысячны калектыў буйнейшага падпрыемства прамысловасьці Мозыру ААТ “Беларуськабель”, бо сыравіна, а гэта медзь для вытворчасьці кабельнай прадукцыі, набываецца ў Расеі, туды яшчэ нядаўна накіроўвалася і асноўная частка гатовай прадукцыі. Зараз прамысловасьць суседняй краіны адраджаецца, зьявіліся там і ўласныя вытворчасьці кабельнай прадукцыі, якая ў параўнаньні з нашай больш танная. Такім чынам, і гэты від тавару становіцца неканкурэнтаздольным і выцясьняецца з расейскага рынку.