Міжнародны ПЭН-клюб заклікае ўлады спыніць перасьлед журналістаў :: Хартыя'97 :: Навiны

Старшыня камітэту “Пісьменьнікі ў зьняволеньні” Міжнароднага ПЭН-клюбу Юджын Шульгін зьвярнуўся з адкрытым лістом да Аляксандра Лукашэнкі, у якім выказаў усхваляванасьць цяглым перасьледам журналістаў закрытай уладамі недзяржаўнай газэты “Пагоня” Мікалая Маркевіча й Паўла Мажэйкі, якім пагражае зьняволеньне ў парушэньне іх права на свабоднае выказваньне сваёй думкі.

Старшыня камітэту “Пісьменьнікі ў зьняволеньні” занепакоены тым, што арт.367 Крымінальнага кодэксу, па якім абвінавачваюцца рэдактар “Пагоні” Мікалай Маркевіч і журналіст газэты Павал Мажэйка, сфармуляваная такім чынам, што падвяргае пакараньню за крытыку кіраўніцтва Беларусі і забясьпечвае вельмі жорсткае пакараньне ў выглядзе пазбаўленьня волі на тэрмін да пяці гадоў.

“Гэты артыкул, - заяўляе Юджын Шульгін, -- зьяўляецца відавочным парушэньнем права на свабоднае выказваньне сваёй думкі й часта выкарыстоўваецца для заглушэння крытыкі ў Ваш бок. Не жадаючы падвяргаць сумневам неабходнасьць нейкай кампэнсацыі асобам, рэпутацыі якіх наносіцца шкода ілжывымі публікацыямі, мы хацелі б адзначыць, што крымінальны перасьлед за хлусьню паўсюль прызнаны занадта жорсткім пакараньнем. Лічыцца, што грамадзянскія суды больш падыходзяць да такіх справаў.

Адмысловы дакладчык па свабодзе слова Камісіі ААН па правох чалавека абвінаваціў ўрадавых чыноўнікаў, якія зьвяртаюцца да крымінальнага перасьледу за паклёп, у выкарыстаньні крымінальнага заканадаўства як сродка ўціску іншадумства.

У дэмакратычным грамадзтве лідэры не зьвяртаюцца ў суды для пакараньня сваіх крытыкаў і прызнаюць, што маюць ў сваім распараджэньні поўны доступ да нацыянальных сродкаў масавай інфармацыі для абвяржэньня абвінавачваньняў”, -- гаворыцца ў лісьце старшыні камітэту “Пісьменьнікі ў зьняволеньні” Міжнароднага ПЭН-клюбу.