Палітычныя вязьні ўтрымліваюцца ў ізалятары ў цяжкіх умовах :: Хартыя'97 :: Навiны

Са спэцпрыёмніка-разьмеркавальніка ГУУС Менгарвыканкаму вызвалены актывіст Кансэрватыўна-хрысьціянскай партыі БНФ Віктар Кавешнікаў і сябра незарэгістраванай арганізацыі “Малады Фронт” Зьміцер Дашкевіч. Яны адбылі дзесяць сутак арышту за ўдзел у несанкцыянаваным шэсьці ў Менску 24 сакавіка, калі апазыцыя адзначала Дзень волі. Паводле словаў Кавешнікава, умовы ўтрыманьня арыштаваных цяжкія. Ім не дазваляюць шпацыру, і яны круглыя суткі знаходзяцца ў бетонным “мяшку”. “Спачатку ў камэры было 7, а затым 10 чалавек. Гэта ўжо шмат, цяжка было нават падняцца з нар”, -- распавёў Кавешнікаў у інтэрвію БелаПАН.

Журналістам, якія сустракалі Дашкевіча й Кавешнікава каля спэцпрыёмніку, ўдалося таксама паразмаўляць зь вядомым палітыкам Вячаславам Сіўчыкам, які адбывае 15 сутак арышту за ўдзел у сьвяткаваньні Дня волі. З-за кратаў вакна сваёй камэры ён вітаў усіх жэстам у выглядзе лацінскай літары “V” – “вікторыя”, “перамога”. Крыкнуў, што не хапае цыгарэтаў. На “Жыве Беларусь!” адазваўся – “Жыве!” Сіўчык сядзеў асобна ад трох астатніх “палітычных”. Кавешнікаў і Дашкевіч адбывалі арышт разам зь лідэрам “Маладога Фронту” Паўлам Севярынцам, арыштаваным, як і Сіўчык, на 15 сутак. Севярынец павінен выйсьці на свабоду 9 красавіка. Сіўчык – 11-га.