У Цэнтральным судзе Менску прайшлі апошнія суды над удзельнікамі сьвяточнага шэсьця ў Дзень Волі. Усе затрыманыя пакараныя – ніводнага чалавека суд не апраўдаў. Судзьдзя Натальля Вайцэховіч і Тацяна Паўлючук разглядалі справы 33 чалавек восем дзён. У выніку чатыры чалавекі – лідэр Маладога Фронту Павал Севярынец, а таксама Вячаслаў Сіўчык, Зьміцер Дашкевіч і Віктар Кавешнікаў – арыштаваныя. Цімафей Дранчук, згодна судоваму прысуду, таксама павінен адседзіць 10 сутак у спэцпрыёмніку-разьмеркавальніку, але ён не зьявіўся на зачытваньне прысуду. Яшчэ 16 чалавек пакараныя штрафамі ў памеры 20 мінімальных заробкаў, а адзін – Андрэй Ачапоўскі – паўтара мільёны рублёў. Астатнія атрымалі папярэджаньні. Некаторым зь іх адміністрацыі прадпрыемстваў пагражаюць звальненьнем з працы.

---

Да шасьці гадоў пазбаўленьня волі ў калёніі ўзмоцненага рэжыму з канфіскацыяй маёмасьці асудзіла калегія Гомельскага абласнога суда былога намесьніка дырэктара Сьветлагорскага аб’яднаньня “Хімвалакно” Валеры Надзеждзіна. Падсуднаму інкрымінавалася атрыманьне хабару й крадзеж. Суд палічыў даказаным той факт, што Надзеждзін незаконна атрымаў каля 92 тысяч даляраў ЗША і больш за 100 тысяч нямецкіх марак.

---

Ужо тыдзень галадае ў турме старшыня гарадзенскай арганізацыі БНФ Сяргей Мальчык. Ён пакараны за ўдзел у сьвяткаваньні Дня Волі. Пра галадоўку Сяргей Мальчык аб’явіў пасьля таго, як быў вынесены прысуд – 10 сутак арышту.

---

Бізнэсоўцы Летувы ў Менску на сустрэчы зь беларускімі прадстаўнікамі дзелавых колаў выказалі пратэст дзеяньням беларускіх мытнікаў. Гэта выклікана тым, што Дзяржаўны мытны камітэт Беларусі з 1 красавіка прадпісаў абавязковае суправаджэньне літоўскіх аўтаперавозчыкаў, якія перавозяць грузы па беларускай тэрыторыі.

---

На дзявятым дзясятку існаваньня спыняе выхад адзіная ў краіне моладзевая газэта “Чырвоная змена”. Адмысловая ліквідацыйная камісія Міністэрства інфармацыі ўжо займаецца працэдурай банкруцтва. Ужо з наступнага тыдня “Чырвонка” можа стаць штотыднёвым дадаткам да газэты “Звязда”.

---