Аргкамітэт “Чарнобыльскага Шляху” вызначыў фармат акцыі :: Хартыя'97 :: Навiны

Нацыянальны камітэт “Чарнобыльскі Шлях-2002”, у які ўвайшлі вядомыя навукоўцы, грамадзкія й палітычныя дзеячы, а таксама прадстаўнікі творчай інтэлігенцыі, вызначыў фармат акцыі. Удзельнікі Шляху зьбяруцца 26 красавіка а 17.30 на плошчы Якуба Коласа. Адтуль калёна па праспэкце Ф.Скарыны і вуліцы Леніна накіруецца на Пляц Волі, дзе пройдзе кароткі мітынг і малебен. Асобная дэлегацыя ўскладзе кветкі да чарнобыльскага звону-помніка на плошчы Незалежнасьці.

Аргкамітэт таксама вызначыў лёзунгі, пад якімі будзе праходзіць гэтая акцыя: “За Беларусь – дзеля будучыні!”, “Беларусі - жыць!”, “Усе разам супраць Чарнобыльскай бяды!” і іншыя.

10 красавіка сябры аргкамітэту выступілі са зваротам, у якім адзначаецца, што за 16 гадоў у выніку радыяцыі памерла больш за 200 000 чалавек. На забруджаных тэрыторыях жыве амаль 2 мільёны чалавек. У тым ліку у раёнах з узроўнем радыяцыі ад 15 да 40 кюры на квадратны кілёмэтар – 140 тысяч. У Расеі і Ўкраіне людзі цалкам адселеныя з такіх раёнаў. Таму сябры аргкамітэту патрабуюць ад уладаў перасяліць з брудных раёнаў людзей, спыніць вытворчасьць прадуктаў харчаваньня на забруджаных тэрыторыях, не замінаць працаваць арганізацыям, якія займаюцца пастаўкамі з-за мяжы гуманітарнай дапамогі. Гэты зварот, пад якім можа падпісацца кожны, 26 красавіка будзе перададзены ва ўрад.

Заяўку на правядзеньне “Чарнобыльскага Шляху”, пад якім падпісалася больш за 100 чалавек, 10 красавіка перадалі ў Менгарвыканкам.