 | ПАЛIТЫКА | |
У гарадзенскай турме ўжо восем дзён галадае журналіст Стас Пачабут
11:19, 12/04/2002
Восьмы дзень галадае карэспандэнт газэты “Навінкі” Стас Пачабут у пастарунку Ленінскага РУУС Горадні. Днямі туды выклікалі “хуткую дапамогу”. Супрацоўнікі газэты “Пагоня” патрабавалі сустрэчы з журналістам, каб даведацца пра стан ягонага здароўя. У выніку рэдактару газэты, нарэшце, дазволілі сустрчу, пасьля таго, як ён сказаў, што мае намер угаварыць Стаса спыніць галадоўку. 
11:18, 12/04/2002
Занепакоенасьць з прычыны “скарг незалежных СМІ, апазыцыйных партыяў, прафсаюзаў і няўрадавых арганізацыяў Беларусі аб перашкодах у іх дзейнасьці з боку органаў улады” выказаў дзяржаўны міністар Нямеччыны Крыстаф Цопель. МЗС Нямеччыны выступіла з заяваю, у якой гаворыцца, што беларускі бок сам справакаваў ізаляцыю краіны ад заходняга сьвету. Федэральны ўрад Нямеччыны выказаў гатоўнасьць працаваць з усімі сіламі, якія выступаюць за дэмакратычнае разьвіцьцё Беларусі.
11:17, 12/04/2002
Працэс лібэралізацыі эканомікі ў Беларусі мае супярэчлівы характар, лічыць кіраўнік прадстаўніцтва Міжнароднай фінансавай карпарацыі ў Беларусі Карл Дагэнхард. “У ім, як мне падаецца, адсутнічае дух лібэралізацыі, не адчуваецца разуменьня сутнасьці дробнага бізнэсу, шчырага жаданьня адкрыць шлях усім, хто хацеў бы гэтым бізнэсам займацца”, - заявіў ён 10 красавіка на прэсавай канфэрэнцыі ў Менску, ацэньваючы стан сэктара малых і сярэдніх прадпрыемстваў у Беларусі.
11:16, 12/04/2002
Уладкаваньне дзьвюх гарналыжных трас у Беларусі павінна завяршыцца да пачатку зімы. Пра гэта паведаміў памочнік прэзыдэнта па пытаньнях фізычнай культуры,спорту й разьвіцьця турызму Мікалай Ананьеў у размове з карэспандэнтам БелаПАН па выніках двухдзённага візыту ў Менск прэзыдэнта Аўстрыйскай лыжнай фэдэрацыі Пэтэра Шрэкснадэля. Са словаў Ананьева, размова йдзе аб трасах у алімпійскім спартовым комплексе “Раўбічы” пад Менскам і ў Лагойскім раёне Менскай вобласьці.
11:15, 12/04/2002
Становішча на прадпрыемстве застаецца як ніколі складаным. Запазычанасьць па падатках ужо склала 7 мільярдаў рублёў, ня выплачаны заробак за люты (паводле некаторай інфармацыі, з асобнымі службамі камбінату не разьлічыліся яшчэ і за сьнежань). Работнікам прапанавалі браць заробак шынамі. Каб зрабіць мадэрнізацыю вытворчасьці й стаць канкурэнтназдольнымі хаця б на расейскім рынку, прадпрыемству неабходна ня менш за 80 мільёнаў даляраў, паведамляе “БДГ”.
11:14, 12/04/2002
Беларускі страхавы саюз накіраваў ліст на імя прэм’ер-міністра Беларусі Генадзя Навіцкага. Падставаю для звароту стала даручэньне прэзыдэнта Савету міністраў ад 22 сакавіка – аб вяртаньні да практыкі страхаваньня савецкіх часоў.
11:13, 12/04/2002
Паводле дадзеных Міністэрства статыстыкі й аналізу Беларусі сёлета ў першым кварталі спажывецкія кошты ў краіне вырасьлі на 12,7 адсоткаў: у студзені – на 6.1, у лютым – на 3,6. у сакавіку – на 2,6. На 2002 год урад і нацыянальны банк прагназаваў павышэньне коштаў на 20-27 адсоткаў. Такім чынам, за першыя тры месяцы прагноз «выкананы» ўжо напалову. Сёлета ў сакавіку спажывецкія кошты ў Расеі вырасьлі на 1,1 адсоткі, у Казахстане – на 0,2, у Кіргізыі – зьнізіліся на 0,1 адсоткі, у Армэніі – на 0,6, ва Ўкраіне – на 0,7, паведамляе БелаПАН.
11:12, 12/04/2002
Больш за пяць з паловаю мільярдаў рублёў запазычылі ў фонд сацыяльнай абароны насельніцтва бабруйскія прадпрыемствы. Амаль палову ад гэтай сумы – 2 мільярды 68 мільёнаў рублёў – павінна толькі РУП БШК “Белшына” – горадаўтвараючае прадпраемства.
11:11, 12/04/2002, Gazeta.ru
У чацьвер вечарам дэпутат парлямэнту Югаславіі, былы міністар унутраных справаў Сэрбіі Влайко Стаільковіч спрабаваў скончыць жыцьцё самагубствам ля галоўнага ўваходу ў будынак Скупшчыны ў Бялградзе, паведамляе ВВС.
11:10, 12/04/2002
Былы міністар працы, аховы здароўя й сацыяльнай палітыкі Югаславіі скончыў жыцьцё самагубствам у Гішпаніі, паведамляе РІА “Новости” са спасылкай на агенцтва “Бэта”. Цела Міадрага Ковача было знойдзена ў ноч на пятніцу ў нумары мадрыдзкага гатэлю “Эўрабілдынг”. Гішпанская паліцыя лічыць, што Ковач зьдзейсьніў самазабойства.
11:09, 12/04/2002
Суд Ленінскага раёну Горадні, які два дні таму прыгаварыў да 10 сутак арышту намесьніка старшыні БНФ Юры Хадыку, пастанавіў, што палітык можа адбываць пакараньне па месцу жыхарства ў Менску. Такім чынам, на дадзены момант Юры Хадыка знаходзіцца на свабодзе й чакае, калі гарадзенская міліцыя адправіць у Менск адпаведныя паперы, і менскія міліцыянты выканаюць тое, што не зрабілі іхнія гарадзенскія калегі.
11:08, 12/04/2002
Пасьля 15-сутачнага арышту на свабоду выйшаў вядомы актывіст БНФ Вячаслаў Сіўчык. Ён адбываў пакараньне за ўдзел у сьвяткаваньні Дня Волі. Сустрэць вядомага апазыцыянэра прыйшло больш за 20 чалавек – актывісты Маладога Фронту, Хартыі’97 і БНФ, а таксама маці, жонка й сын. У пастарунку Сіўчык чытаў газэты і вёў размовы на грамадзка-палітычныя тэмы са сваімі сукамернікамі. Са словаў Сіўчыка, міліцэйскае начальства напярэдадні Вялікадня не пусьціла да яго сьвятара, хаця ён як хрысьціянін хацеў спавядацца. Вячаслаў Сіўчык дадаў, што арышт яго не запужаў і ён абавязкова будзе прымаць удзел у Маршы Пратэсту 19 красавіка і ў Чарнобыльскім Шляху 26 красавіка.
11:07, 12/04/2002
Літве неабходна трымацца ўласнай палітыкі адносна Беларусі – суседняй дзяржавы. Так прэсавы сакратар беларускага Міністэрства замежных справаў Павал Латушка пракамэнтаваў у Менску журналістам слуханьні ў літоўскім сэйме (парлямэнце), прысьвечаныя зьнікненьню вядомых беларускіх дзеячаў. Зь ягоных словаў, палітыка Літвы ў гэтым пытаньні “непасьлядоўная і супярэчлівая”.
11:06, 12/04/2002, Gazeta.ru
Той факт, што для Аляксандра Лукашэнкі хакей зьяўляецца хобі, ні для каго не зьяўляецца сакрэтам. У аўторак кіраўнік дзяржавы, які таксама займае пасаду прэзыдэнта НАК, прыйшоў на трэніроўку нацыянальнай зборнай, якая рыхтавалася да выступу на чэмпіянаце сьвету (Дывізіён І) у галяндзкім Эйндховэне. Трэнер Уладзімер Крыкуноў і ігракі доўга размаўлялі з прэзыдэнтам, згадваючы пра перамогу каманды на алімпійскіх гульнях у Солт-Лэйк-Сіці, і абмяркоўваючы пэрспэктывы разьвіцьця хакею ў краіне. Аляксандар Лукашэнка распавёў пра свае пляны будаўніцтва яшчэ шэрагу ільдовых палацаў па ўсёй Беларусі. Некалькі гадоў таму менавіта зь ягонай ініцыятывы ў кожным абласным цэнтры краіны былі ўзьведзеныя новыя арэны. Аднак, паводле словаў Аляксандра Рыгоравіча, іхная колькасьць на сёньня не задавальняе патрэбаў, і ўжо ў самым хуткім часе пачнецца новая хваля будаўніцтва.
11:05, 12/04/2002
Напярэдадні леташніх прэзыдэнцкіх выбараў улады розных рэгіёнаў Беларусі канфіскавалі кампутары і іншую офісную тэхніку ў няўрадавых арганізацыях і прыватных выданьнях. Канфіскацыі праходзілі на падставе прэзыдэнцкага дэкрэту №8, які забараняў выкарыстаньне замежнай дапамогі на вытворчасьць і распаўсюд агітацыйных матэрыялаў. Частку тэхнікі вярнулі пасьля выбараў, але абсалютная большасьць захоўваецца на складах ці распрадаецца праз камісійныя крамы.
11:04, 12/04/2002
У час свайго наведваньня Масквы Аляксандар Лукашэнка мае намер абмеркаваць у Маскве з кіраўніком расейскае дзяржавы Ўладзімерам Пуціным “адзін на адзін” сытуацыю вакол расейска-беларускай кампаніі “Славнефть”. Адказваючы на пытаньні па прыезьдзе ў Маскву, Лукашэнка назваў “недопустимым во взаимоотношении двух государств“ той факт, што ён усяго толькі “поставлен в известность” расейскім бокам аб плянах зьмены сёньняшняга прзыдэнта кампаніі Міхаіла Гуцырыева.
11:03, 12/04/2002
Супрацоўнікамі ўпраўленьня па Берасьцейскай вобласьці камітэту па барацьбе з арганізаванай злачыннасьцю й карупцыяй МУС затрыманыя два інспэктары мытняў, адзін зь якіх абвінавачваецца ў злоўжываньні службовымі паўнамоцтвамі, другі – у хабарніцтве.
11:02, 12/04/2002, Deutsche welle
Сьляды злачынцаў, датычных да зьнікненьня бургамістра нямецкага гораду Рёкінгена, вядуць у Беларусь. Пра гэта паведамілі прадстаўнікі сьледчай групы. Эрых Кундэр зьнік 5 сакавіка. У дзесяць гадзін вечара ён патэлефанаваў жонцы з іншага гораду і пра гадзіну-паўтары абяцаў быць дома. Што здарылася зь ім пасьля – невядома.
11:01, 12/04/2002, НТВ
Генэрал нацыянальнай гвардыі Албэрта Камача Каірус паведаміў у чацьвер, што ўрад прэзыдэнта Уга Чавеса “склаў свае паўнамоцтвы” і краіна знаходзіцца пад ўладай ўзброеных сілаў, перадае Reuters. Генэрал зрабіў гэтую заяву па мясцовай тэлевізіі. Раней высокапастаўленыя вайскоўцы абвінавацілі прэзыдэнта ў арганізацыі гвалту падчас буйнога аўнтыўрадавага маршу пратэсту. “Уся краіна знаходзіцца пад кантролем дзяржаўных узброеных сілаў, --сказаў Камача Каірус.— Урад склаў свае паўнамоцтвы”.
| |
|
, iнформэр
