“Белшына” не дацягне да прыватызацыі :: Хартыя'97 :: Навiны

Становішча на прадпрыемстве застаецца як ніколі складаным. Запазычанасьць па падатках ужо склала 7 мільярдаў рублёў, ня выплачаны заробак за люты (паводле некаторай інфармацыі, з асобнымі службамі камбінату не разьлічыліся яшчэ і за сьнежань). Работнікам прапанавалі браць заробак шынамі. Каб зрабіць мадэрнізацыю вытворчасьці й стаць канкурэнтназдольнымі хаця б на расейскім рынку, прадпрыемству неабходна ня менш за 80 мільёнаў даляраў, паведамляе “БДГ”.

Уласных сродкаў на гэта ў яго няма, а дзяржава даць такі крэдыт таксама ня ў стане. Таму на канфэрэнцыі працоўнага калектыву было вырашана акцыянавацца. У сярэдзіне лютага на камбінаце пабывала высокапастаўленая дэлегацыя буйнейшага вытворцы шынаў у Эўропе французскай фірмы “Мішлен”. Пасьля знаёмства з вытворчасьцю, французы паехалі “вывучаць пытаньне” на радзіму і паабяцалі ў хуткім часе даць адказ. Але надзеі адміністрацыі заводу на тое, што ён будзе станоўчым, не апраўдаліся. У лісьце, які нядаўна прыйшоў, гаворыцца, што “Мішлен” ня мае дастаткова сродкаў для ажыцьцяўленьня інвэстыцыйнага праекту.

Магчыма, французаў напужала больш чым 60 адсоткавая зношанасьць тэхналягічнага абсталяваньня й будынкаў камбінату, а таксама абавязковая ўмова: кантрольны пакет акцыяў застаецца ў руках дзяржавы. Як бы там ні было, “Белшына” працягвае напружаны пошук інвэстараў. Сярод магчымых “кандадатаў” называюць фірмы “Амтел”, “Сибур”, “Татнефть”. Між тым у Бабруйску ходзяць чуткі аб няўдалай спробе генэральнага дырэктара “Белшыны” Зьмітра Сівіцкага падаць у адстаўку.