Беларускія ўлады адмовілі ў візе часоваму кіраўніку КНГ АБСЭ :: Хартыя'97 :: Навiны

Часовы кіраўнік менскай місіі АБСЭ Мішэль Рывалье вымушаны быў пакінуць Беларусь – беларускія ўлады адмовіліся падоўжыць спадару Рывалье ўязную візу. Гэта ўжо другі кіраўнік Кансультатыўна-назіральнае групы АБСЭ, які за апошнія паўгода вымушаны зьехаць зь Беларусі з-за жорсткіх мер беларускага кіраўніцтва, якое патрабуе перагляду мандату місіі і абвінавачвае АБСЭ ва ўмяшальніцтве ва ўнутраныя справы Беларусі. Старшыня АБСЭ Антоніа да Круз выказаў занепакоенасьць ў сувязі з такой сытуацыяй і папярэдзіў беларускія ўлады аб “адпаведнай рэакцыі кіраўніцтва АБСЭ”.

Чарговы кіраўнік КНГ АБСЭ Мішэль Рывалье, які быў выконваючым абавязкі кіраўніка місіі, пакідае Беларусь як Ганс-Георг Вік. Тэрмін ягонай ўязной візы сыходзіць сёньня, 15 сакавіка. Беларускія ўлады адмаўляюцца камэнтаваць гэтую скандальную сытуацыю.

У КНГ АБСЭ Радыё Рацыя таксама адмовіліся пракамэнтаваць сытуацыю і спаслаліся на тое, што зараз ідуць актыўныя перамовы з уладамі Беларусі. Разам з тым, у КНГ АБСЭ паведамілі, што месца выконваючага абавязкі кіраўніка КНГ АБСЭ, хутчэй за ўсё, зойме ангелец Эндру Карпэнтэр. Пакуль невядома, калі сканчваецца беларуская віза ў Карпэнтэра, іншымі словамі – на які тэрмін будзе адкладзены выхад з гэтай канфліктнай сытуацыі.

Нагадаем, што беларускія ўлады заяўляюць, што толькі пасьля перагляду мандату АБСЭ беларускія ўлады зацьвердзяць кандыдатуру новага кіраўніка місіі немца Эбэргарда Хайкэна. Міністар замежных спарваў Беларусі Міхаіл Хвастоў заявіў, што пакуль мандат Кансультатыўна-назіральнае групы ня будзе зьменены, ён “ня бачыць сэнсу для далейшага знаходжаньня групы ў Менску”.