Беларускія журналісты патрабуюць спыніць крымінальны перасьлед сваіх калег :: Хартыя'97 :: Навiны

Прадстаўнікі шэрагу беларускіх недзяржаўных СМІ падпісалі “Зварот у сувязі з пагаршэньнем сытуацыі са свабодай слова ў Рэспубліцы Беларусь”. Сярод падпісантаў звароту – прадстаўнікі грамадзкай арганізацыі “Беларуская асацыяцыя журналістаў” (БАЖ), кіраўнікі й супрацоўнікі недзяржаўных выданьняў; усяго - каля 15 чалавек. Зварот адкрыты для падпісаньня, збор подпісаў праводзіць БАЖ.

У ім у прыватнасьці, адзначаецца, што “пасьля прэзыдэнцкіх выбараў 2001 году ўлады актывізавалі ўціск на свабоду слова і інфармацыі. Закрытая адна са старэйшых беларускіх незалежных газэт “Пагоня”. Паводле публікацыі вострых крытычных матэрыялаў у шэрагу выданьняў распачатыя крымінальныя справы. Галоўны рэдактар “Пагоні” Мікалай Маркевіч і карэспандэнт газэты Павал Мажэйка прыцягнутыя да суда па абвінавачваньні ў зьдзяйсьненьні злачынства – паклёп на прэзыдэнта Рэспублікі Беларусь (ч.2 арт.367 КК Беларусі). Арганізаваны пратэст гарадзенскіх журналістаў супраць суда над іх калегамі быў падаўлены з дапамогай міліцыі. Трынацццаць удзельнікаў пікету атрымалі штрафы і арышты на тэрмін ад 3 да 10 сутак”. “Такога стаўленьня ўладаў да прэсы, --адзначаецца ў звароце, – даўно не назіраецца на ўсёй эўрапейскай прасторы. Беларусь засталася апошняй “зонай маўчальніцтва” на мапе Эўропы, дзе ўлада прымяняе рэпрэсіўныя мэтады барацьбы з іншадумствам, а на словах дэкляруе сваю прыхільнасьць да каштоўнасьцей дэмакратыі”.

Аўтары звароту патрабуюць спыніць крымінальны перасьлед журналістаў Мікалая Маркевіча і Паўла Мажэйкі, спыніць іншыя крымінальныя справы датычна журналістаў, якія выконвалі прафэсійныя абавязкі. “Праваахоўчыя органы – пракуратура, міліцыя, КДБ – не павінны выкарыстоўвацца ў якасьці інструмэнту рэпрэсіяў супраць няўгодных уладам СМІ і журналістаў, а суды – ператварацца ў сродак расправы над іншадумцамі”, -- падкрэсьліваецца ў звароце. Ягоныя аўтары заклікаюць беларускіх заканадаўцаў “адказна падыйсьці да абмеркаваньня праектаў закону “Аб асновах забесьпячэньня інфармацыйнай бясьпекі” і новай рэдакцыі закону “Аб сродкай масавай інфармацыі”. “Заканадаўства аб СМІ павінна адпавядаць міжнародна-прававым стандартам і служыць усяму грамадзтву, а не кожнаму паасобна. У сувязі з гэтым мы настойваем на правядзеньні адкрытага грамадзкага абмеркаваньня згаданых законапраектаў і на іх незалежнай экспэртызе”, -- гаворыцца ў звароце. У ім таксама гучыць заклік да беларускай і міжнароднай грамадзкасьці выказаць сваё стаўленьне да сытуацыі са свабодай слова ў Беларусі.