Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Кіраўнікі дыпляматычных ведамстваў Эўрапейскага Зьвязу падтрымалі прапановы Вялікабрытаніі й Швэцыі пачаць усталёўваць новыя дачыненьні з трыма краінамі, якія стануць новымі суседзямі Эўразьвязу пасьля ягонага пашырэньня. Адна з прапановаў Вялікабрытаніі – прапанаваць Беларусі, Малдове й Украіне “адмысловы статус суседзяў”. Гэты статус паспрабуе вызначыць Эўрапейская камісія ў часе старшыняваньня Даніі ў Эўразьвязе, якое пачынаецца ў ліпені. Статус будзе прывязаны да схемы, якая будзе прапаноўваць Беларусі, Малдове й Украіне паступовую лібэралізацыю гандлю з Эўразьвязам у абмен на правядзеньне эканамічных і палітычных рэформаў і паляпшэньне cытуацыі з правамі чалавека, паведамляе Радыё Свабода са спасылкай на “Financial Times”.
Працягваюцца скандалы, зьвязаныя з парушэньнем свабоды слова ў Беларусі. Сумны лёс журналістаў ОРТ Паўла Шарамета й Зьмітра Завадзкага паўтарылі журналісты гарадзенскай апазыыйнай газэты “Пагоня”, закрытай з рашэньня Вышэйшага гаспадарчага суда рэспублікі. Нягледзячы на тое, што былы рэдактар “Пагоні” Мікола Маркевіч і карэспандэнт Павал Мажэйка пакуль на волі, абвінавачваньне, якое ім інкрымінуецца (паклёп на кіраўніка дзяржавы), прадугледжвае пакараньне да 5 гадоў зьняволеньня.
Дэлегацыя беларускай палітычнай апазыцыі атрымала запрашэньне для ўдзелу ў сэсіі Парлямэнцкай асамблеі Рады Эўропы. У Стразбургу дэлегацыя плянуе падняць пытаньне аб лёсе Кансультатыўна-назіральнае групы АБСЭ ў Беларусі.
Камітэт дзяржаўнага кантролю Беларусі падрыхтаваў праект указу прэзыдэнта аб стварэньні ў Беларусі сыстэмы бюджэтнага кантролю. Пра гэта 15 красавіка падчас сустрэчы з членамі бюджэтнай камісіі “палаты прадстаўнікоў” паведаміў першы намесьнік старшыні КДК Міхаіл Матусевіч.
Кіраўніцтва магілёўскага абласнога камітэту Беларускага патрыятычнага саюзу моладзі зьвярнулася ў аблвыканкам з просьбай выдаткаваць грашовую субсыдыю з тэрмінам пагашэньня за два месяцы на выплату заробку супрацоўнікам апарату мясцовых структур сваёй арганізацыі.
Міністэрства фінансаў Беларусі плянуе выдаткаваць Беларускаму металюргічнаму заводу 20 мільёнаў даляраў ЗША для закупу сыравіны й матэрыялаў. Згаданая сума выдаткоўваецца са сродкаў дзяржаўнага крэдыту Расейскай Фэдэрацыі, аб якім было дамоўлена 30 лістапада 2001 году.
Выконваючы абавязкі кіраўніка АБСЭ ў Беларусі Мішэль Рывалье, якому беларускія ўлады адмовілі падоўжыць уязную візу, пакінуў краіну. Як паведамляе Радыё Свабода са спасылкаю на КНГ АБСЭ ў Беларусі, Мішэль Рывалье выляцеў у Вену, дзе знаходзіцца штаб-кватэра АБСЭ. Сёньня там адбудзецца адмысловая сэсія Сталай рады АБСЭ, прысьвечаная сытуацыі ў Беларусі. Сп.Рывалье, паводле інфармацыі радыё, будзе прысутнічаць на гэтай сэсіі і будзе выступаць перад Сталай Радай.
МЗС Беларусі, а таксама ідэалягічнае ўпраўленьне пры Адміністрацыі прэзыдэнта, адмовіліся ад сустрэч з экспэртамі міжнароднай арганізацыі ARTIСLE 19, якія прыбылі ў Менск для абмеркаавньня законапраекту аб СМІ. Раней міністар інфармацыі Міхаіл Падгайны абяцаў накіраваць беларускі законапраект у эўрапейскія структуры на экспэртызу. Абяцаньні міністра прагучалі на слуханьнях па СМІ ў Радзе Эўропы.
Акцыю ў падтрымку Юры Бандажэўскага, зьняволенага прафэсара Гомельскага мэдычнага інстытуту, плянуюць наладзіць 4 траўня ў Жэневе актывісты эўрапейскіх грамадзкіх арганізацыяў. Прафэсар Бандажэўскі асуджаны на 8 гадоў па авінавачваньні ў атрыманьні хабару. Між тым, прафэсар зьяўляецца актыўным праціўнікам урадавай праграмы засяленьня забруджаных тэрыторыяў Чарнобыльскай зоны.
У сувязі з 10-годзьдзем з дня ўстанаўленьня дыпляматычных стасункаў паміж Беларусяй і Кубай міністар замежных справаў Міхаіл Хвастоў накіраваў ліст свайму кубінскаму калегу Феліпэ Пэрэсу Рокэ, у якім выказаў задавальненьне ад “высокай ступені даверу й разнастайнага характару супрацоўніцтва паміж дзьвюма краінамі”, паведамляе прэсавая служба МЗС Беларусі.
Каля 5 тысяч тэлефонных апаратаў былі адключаныя сувязістамі Віцебскай вобласьці ў сакавіку. Прычына – няўплата абанентаў за паслугі сувязі. Трэба зазначыць, што сярод адключаных ведамстваў апынуліся Ўпраўленьне ўнутраных справаў аблвыканкаму, АУС Кастрычніцкага і Чыгуначнага раёнаў абласнога цэнтру, якія запазычылі за паслугі тэлефонаў каля 3 мільёнаў рублёў.
Шэсьць сустрэч беларускага прэзыдэнта з буйнейшымі расейскімі бізнэсоўцамі на мінулым тыдні адбыліся па ўсіх правілах гасьціннасьці. Аўдыенцыя ў рабочай рэзыдэнцыі кіраўніка дзяржавы, падчас якой абраны “інвэстар” даведваўся аб тым, што ад яго чакаюць, завяршалася абедам у Доме ўраду. На перамовах будучым уласьнікам дастаткова было трымацца трох умоваў: не перабіваць, не пярэчыць і не спрачацца з Аляксандрам Лукашэнкам. Аднак роля статыстаў не задаволіла большасьць нафтавых генэралаў. Адкрытым засталося пытаньне: навошта прэзыдэнт сустракаўся з элітай расейскага бізнэсу.
, iнформэр
