ЗША далучаюцца да Эўразьвязу і цалкам падтрымліваюць місію АБСЭ ў Беларусі :: Хартыя'97 :: Навiны

Злучаныя Штаты далучыліся да Эўразьвязу і заявілі пра поўную падтрымку Кансультатыўна-назіральнай групы АБСЭ ў Беларусі і выконваючага абавязкі ейнага кіраўніка Мішэля Рывалье, якому Беларусь адмовіла ў падаўжэньні візы. “Мы лічым працу місіі АБСЭ ў Беларусі неабходнай для разьвіцьця дэмакратычных інстытутаў і выкананьня абавязацельстваў АБСЭ, -- заявіў на паседжаньні Сталай рады АБСЭ ў Вене амбасадар Стывен М.Мінікес. – Далейшыя перашкоды працы КНГ ня толькі парушаюць прынцыпы, на якіх заснаваная гэтая арганізацыя, але і што самае сумнае, спыняюць жаданьне Беларусі спыніць сваю самаізаляцыю”. Ніжэй тэкст ягонай заявы:

Злучаныя Штаты вітаюць прысутнасьць сп.Рывалье, які выконвае абавязкі кіраўніка Кансультатыўна-назіральнай групы (КНГ) у Беларусі, на гэтым паседжаньні АБСЭ.

Мы далучаемся да Эўразьвязу і заяўляем пра нашу поўную падтрымку сп.Рывалье. Выказваем таксама нашу цьвёрдую падтрымку іншым супрацоўнікам місіі АБСЭ ў Беларусі і іх працы. Яна ўключае ў сябе выкананьне праектаў, распрацаваных КНГ, і рэгулярныя справаздачы аб разьвіцьці сытуацыі. Гэтую дзейнасьць неабходна працягваць і прасоўваць наперад.

Сп.Рывалье зьяўляецца вышэйшым прадстаўніком арганізацыі ў Беларусі, і мы заклікаем Беларусь неадкладна падоўжыць ягоную візу.

Сп.старшыня, дачыненьні АБСЭ зь Беларусяй пэрсаніфікаваныя ў працы тых асобаў, якія прадстаўляюць арганізацыю як супрацоўнікі місіі ў Беларусі. Дачыненьні Беларусі з АБСЭ і КНГ павінна вызначаць супрацоўніцтва.

Мы лічым працу місіі АБСЭ ў Беларусі неабходнай для разьвіцьця дэмакратычных інстытутаў і выкананьня абавязацельстваў АБСЭ. Далейшыя перашкоды працы КНГ ня толькі парушаюць прынцыпы, на якіх заснаваная гэтая арганізацыя, але і, што самае сумнае, падрываюць жаданьне Беларусі спыніць сваю самаізаляцыю.

Сп.старшыня, для эфэктоўнай працы місіі АБСЭ ў Беларусі неабходнае цьвёрдае кіраўніцтва. Акрамя таго, для канструктыўнага дыялёгу аб будучай працы місіі неабходныя два партнёры.

Мы падтрымліваем вашыя намаганьні па забесьпячэньні такога кіраўніцтва місіяй, і з гэтай мэтай, а таксама для таго, каб палепшыць пэрспэктывы супрацоўніцтва паміж АБСЭ і Беларусяй і дазволіць місіі эфэктоўна выконваць сваю працу, мы заклікаем неадкладна прызначыць новага кіраўніка місіі КНГ.

Мы таксама заклікаем Вас зрабіць усе дадатковыя крокі, неабходныя і мэтазгодныя для патрэбнага папаўненьня і паўнацэннага функцыянаваньня КНГ.