Міліцыя затрымала 40 чалавек падчас разгону дэманстрацыі :: Хартыя'97 :: Навiны

Прыкладна 40 дэманстрантаў (паводле больш дакладных дадзеных у спэцпрыёмніку-разьмеркавальніку на вуліцы Акрэсьціна апынулася 62 чалавекі – заўв.Хартыі`97) яшчэ заставаліся ў Менскай турме ў пятніцу пасьля таго, як міліцыя, узброеная дубінкамі, разагнала Марш Пратэсту супраць нізкага ўзроўню і нізкіх заробкаў.

Прыкладна 15 удзельнікаў Маршу, большасьць зь якіх непаўнагадовыя, былі вызваленыя ноччу, -- паведаміў Андрэй Саньнікаў, лідэр праваабарончай арганізацыі “Хартыя`97”. Як стала вядома, некалькі маніфэстантаў былі зьмешчаныя ў шпіталі з траўмамі.

Паводле словаў Саньнікава, такія дзеяньні міліцыі супраць папярэдне аб’яўленай мірнай дэманстрацыі мелі за мэту застрашыць удзельнікаў наступнай буйнейшай антыўрадавай дэманстрацыі ў Беларусі, вядомай як Чарнобыльскі Шлях і прысьвечанай гадавіне чарнобыльскай атамнай катастрофы. Гэтую акцыю пратэсту плянуецца правесьці ў наступную пятніцу. У выніку выбуху рэактара ў 1986 годзе, разьмешчанага ва Ўкраіне на мяжы зь Беларусяй, пятая частка Беларусі была забруджаная радыёактыўнымі ападкамі.

Дэманстранты выступаюць супраць кіраваньня Аляксандра Лукашэнкі, які кіруе Беларусяй з 1994 году. Ягоны пракамуністычны ўрад кантралюе большасьць аспэктаў адсталай беларускай эканомікі і дапускае толькі абмежаваную палітычную апазыцыю.

У дэманстрацыі 19 красавіка, якая праходзіла на галоўным праспэкце Менску, прымала ўдзел некалькі сотняў чалавек. Некаторыя несьлі забароненыя бел-чырвона-белыя сьцягі. Гэты сьцяг зьяўляўся афіцыйным сьцягам першыя гады пасьля абвяшчэньня незалежнасьці Беларусі.

Дэманстранты выступілі пад лёзунгам “ТАК ЖЫЦЬ НЕЛЬГА!”. Але некаторыя таксама несьлі транспаранты, якія абвінавачваюць урад у нелегальнай ваеннай дапамозе Іраку. Гэтае абвінавачваньне было агучана амэрыканскімі афіцыйнымі прадстаўнікамі, якія наведвалі Менск сёлета ў лютым.

Сп. Саньнікаў паведаміў, што Марш Пратэсту меў мірны характар, пакуль некалькі аўтобусаў зь міліцыянтамі, адмыслова экіпіраванымі для разгону дэмантрацыяў, не загарадзілі шлях калёне маніфэстантаў і не дазволілі людзям рушыць наперад.

“Калі дэманстранты падыйшлі да першага ланцугу спэцназу, яны разьвярнуліся і пайшлі ў адваротны бок, -- сказаў сп.Саньнікаў, - і затым іх пачалі зьбіваць”.

Паводле інфармацыйных агенцтваў, дэманстрантаў зьбівалі дубінкамі, калі яны сядзелі на праежджай частцы, затым забіралі ў пастарунак.

Як паведамляе вэб-сайт “Хартыі`97” www.charter97.org, шэсьць маніфэстантаў былі дастаўленыя ў шпіталь з траўмамі галавы. Паводле інфармацыі, адзін з удзельнікаў Маршу знаходзіцца ў цяжкім стане.

Сярод арыштаваных – вядомы беларускі рэжысэр Юры Хашчавацкі. Паводле паведамленьняў вэб-сайту “Хартыі`97”, адзін з арганізатараў Маршу, 60-гадовы журналіст Валеры Шчукін быў зьбіты да страты непрытомнасьці.

Міліцыя паведаміла, што сп.Шчукіну нанесеныя пашкоджаньні ніжняй часткі сьпіны й паясьніцы.

Сп.Лукашэнку ўжо крытыкуе большасьць заходніх урадаў з-за парушэньня ім правоў чалавека. Два асноўных апанэнта Лукашэнкі зьніклі падчас яго кіраваньня, а былы супрацоўнік беларускіх спэцслужб паведаміў летась, што адзін са зьніклых быў забіты і пахаваны ля адной з вайсковых частак.

Беларусь рэагуе на крытыку з усё больш вялікім раздражненьнем. У панядзелак урад выгнаў з краіны кіраўніка ўраду АБСЭ ў Беларусі, які наглядае за захаваньнем правоў чалавека і адмовіла ў выдачы візы супрацоўніку, які павінен быў зьмяніць яго.