Гарачая пара прэзыдэнта :: Хартыя'97 :: Навiны

У барацьбе за пасаду прэзыдэнта “Славнефти” напярэдадні прыватызацыі кампаніі адбыўся нечаканы паварот. На паседжаньні ейнай рады дырэктараў у мінулую пятніцу прадстаўнікі Беларусі (валодаюць 10,8% акцыяў кампаніі) унесьлі кандыдатуру віцэ-прэзыдэнта дзяржаўнай “Роснефти” Анатоля Бараноўскага для абраньня кіраўніком “Славнефти” на пазачарговым сходзе акцыянэра 13 траўня.

У чацьвер, як вядома, прэм’ер Міхаіл Касьянаў загадаў “забясьпечыць абраньне” на гэтую пасаду віцэ-прэзыдэнта “Славнефти”, які раней працаваў у “Сибнефти” Юры Суханава (расейскі бок валодае 75% акцыяў). Экспэрты называюць такое разьвіцьцё падзеяў актывізацыяй дзейнасьці Межпромбанка, які ня супраць набыць частку (19,68%) дзяржпакету акцыяў “Славнефти” на аўкцыёне ў канцы гэтага году.

Беларускі бок, які падтрымліваў сёньняшняга кіраўніка “Славнефти” Міхаіла Гуцырыева. Пасьля сустрэчы Аляксандра Лукашэнкі з Уладзімерам Пуціным на гэтую тэму ўжо не выказваліся. Прэзыдэнт дзяржканцэрну “Белнафтахім” Іван Бамбіза толькі заяўляў, што не застанецца абыякавым і будзе вылучаць кандыдатуру, але чыю – не сказаў.

У Мінэканомікі Беларусі зьвяртаюць увагу на тое, што ідэя вылучыць Анатоля Бараноўскага зьявілася ў Аляксандра Лукашэнкі пасьля ягонай сустрэчы зь дзяржаўным сакратаром “саюзу” Расеі й Беларусі Паўлам Барадзіным. Гэты факт можа сьведчыць пра тое, што фігура сп.Бараноўскага блізкая да Межпромбанка: сп. Барадзін даўно вядомы сувязямі з кіраўніком “Межпрома” Сяргеям Пугачовым. Сам віцэ-прэзыдэнт “Роснефти” па доўгу службы працаваў з гэтым банкам падчас стварэньня кампаніі “Русский уголь”. А з камандай уладальніка “Сибнефти” Раманам Абрамовічам ён ня вельмі ладзіць: у студзені 1998 году былы прэзыдэнт “Роснефти” Юры Бяспалаў (блізкі да “Сибнефти”) нават падпісаў загад аб адстаўцы сп.Бараноўскага. Праўда, загаду ходу ня далі, і сп.Бараноўскі займае ранейшую пасаду.

У “Роснефти” кажуць, што даведаліся пра ягонае вылучэньне толькі пасьля паседжаньня рады дырэктараў “Славнефти”. З прэзыдэнтам “Роснефти” Сяргеям Багданчыкавым сп.Бараноўскі ня раіўся. “Гэта асабістае рашэньне Анатоля Іванавіча”, - так пракамэнтаваў вылучэньне сп.Бараноўскага на пасаду прэзыдэнта “Славнефти” прэсавы сакратар “Роснефти” Аляксандар Сьцепаненка.

Магчымасьць кандыдата ад Беларусі заняць пасаду прэзыдэнта Расейска-беларускай дзяржаўнай нафтакампаніі пакуль выглядае дастаткова безнадзейна. Але, як мяркуюць у Мінэканомікі Беларусі, ня выключана, што кандыдатура Юры Суханава да 13 траўня будзе зьнятай, і тады Анатоль Бараноўскі застанецца адзіным прэтэндэнтам. Межпромбанк, як стала зразумела пасьля некалькіх сюжэтаў на падкантрольным яму канале ТВ-3, мае намер разгарнуць шырокую кампанію супраць Рамана Абрамовіча і “Сибнефти”, мэтай якой у дадзеным выпадку зьяўляецца адмена распараджэньня Міхаіла Касьянава аб вылучэньні сп.Суханава. Бо банк ужо пачаў рыхтавацца да абраньня прэзыдэнта “Славнефти” і згодна дамоўленасьці з Міхаілам Гуцырыевым ужо здолеў прызначыць першым віцэ-прэзыдэнтам кампаніі свайго першага намесьніка кіраўніка Аляксандра Гнусарава – фактычна на полі дзейнасьці сп.Суханава, які пайшоў у адпачынак.

Шанцы ажыцьцявіць гэтую ідэю залежаць толькі ад таго, наколькі моцныя пазыцыі Міхаіла Касьянава да “піцерскай каманды”, да якой далучаюць Межпромбанк. Часу для барацьбы (з улікам сьвятаў) засталося няшмат.