У Эўропе адбудуцца акцыі ў абарону прафэсара Бандажэўскага :: Хартыя'97 :: Навiны

Напярэдадні гадавіны Чарнобыльскай катастрофы прадстаўнікі сеткі міжнародных арганізацыяў “Навукоўцы супраць ядзерных дасьледаваньняў” і супрацоўнікі незалежнай лябараторыі радыёлягічных дасьледаваньняў CRIRAD (Францыя) праводзяць сэрыю акцыяў у падтрымку беларускага прафэсара Юры Бандажэўскага.

Як паведамляе Радыё Свабода, 25 красавіка ў швэйцарскім Базэлі франзузскія й швэйцарскія дактары ладзяць прэм’еру фільма аб навуковай дзейнасьці гомельскага дасьледчыка. 26 красавіка ў Жэневе прадстаўнікі міжнародных арганізацыяў уручаць свой ліст адмысловай Камісіі па правох чалавека пры ААН з патрабаваньнем вызваліць з турмы іх беларускага калегу.

25 траўня ля будынка ААН у Жэневе будзе праводзіцца мерапрыемства “Свабоду Юры Бандажэўскаму!”. Гэтая акцыя перш была заплянаваная на 4 траўня. Аднак у сувязі з тым, што прыехаць у Жэневу пажадала вялікая колькасьць прадстаўнікоў антыядзерных ініцыятываў з розных краін сьвету, мерапрыемства перанесенае на тры тыдні пазьней.

У свой час гэтыя навукоўцы з Францыі, Швэйцарыі, Новай Зяляндыі, Аўстраліі, Бразіліі, ЗША, іншых краін сьвету выступілі ў падтрымку вязьненых Мандэлы, Сахарава, Нікіціна...Зараз яны ўсхваляваныя лёсам беларускага прафэсара Бандажэўскага.