Жонкі рэпрэсаваных беларускіх палітыкаў пратэстуюць супраць сілавога ўціску Маршу Пратэсту :: Хартыя'97 :: Навiны

Міжнароднае грамадзкае аб’яднаньне імя Генадзя Карпенкі, якое ачольвае ўдава вядомага беларускага палітыка і аб’ядноўвае жонак рэпрэсаваных беларускіх палітыкаў, выступіла з заяваю ў сувязі з жорсткім уціскам Маршу Пратэсту “ТАК ЖЫЦЬ НЕЛЬГА!” і рэпрэсіямі ягоных удзельнікаў. Зьмяшчаем тэкст заявы цалкам.

“19 красавіка 2002 году ў Менску была жорстка разагнаная мірная дэманстрацыя, якая праходзіла пад лёзунгам “Так жыць нельга!” і ставіла за мэту прыцягнуць ўвагу жыхароў Беларусі да нявырашаных сацыяльных пытаньняў, якія стала абвастараюцца: павышэньне стыпендыяў, заробкаў, пэнсіяў, кампэнсацыі ўкладаньняў насельніцтву, а таксама да праблемы захаваньня ў Беларусі асноўнага права чалавека – права на жыцьцё.

У чарговы раз улады паказалі свой сапраўдны твар. Акцыя была жорстка падаўленая. Былі зьбітыя ейныя ўдзельнікі, у тым ліку жанчыны, старыя і дзеці. Больш за 100 чалавек былі арыштаваныя і дастаўленыя ў аддзяленьні міліцыі. Каля 20 зь іх непаўнагадовых незаконна ўтрымліваліся пад вартай больш за тры дні. Многія затрыманыя зьведалі зьнявагу й зьдзекі. Дзясяткі людзей да гэтага часу знаходзяцца ў засьценках.

Каля ўлада жорсткім чынам уціснула мірнае шэсьце грамадзян Беларусі, якія хацелі атрымаць адказы на сацыяльныя пытаньні, то якім чынам яна расправілася з тымі, хто сумленна і адкрыта супрацьстаяў рэжыму?

Мы асуджаем такія дзеяньні ўладаў. Лічым, што такі барбарскі ўціск мірнай дэманстрацыі не садзейнічае ўсталяваньню згоды ў грамадзтве, разьядноўвае людзей і не дазваляе цывілізаваным шляхам вырашаць сацыяльныя праблемы.

Мы патрабуем неадкладнага вызваленьня ўсіх вязьняў і адмены ўсіх карацельных санкцыяў.

Мы патрабуем, каб тыя, хто дапусьціў уціск мірнага шэсьця былі пакараныя, бо любая беспакаранасьць нараджае ўседазваляльнасьць і вядзе да тэрарызму.

Гэта не павінна больш паўтарацца!”