Лідэр фракцыі “Союз правых сил” у расейскай Дзяржаўнай Думе Барыс Нямцоў сустрэўся са сваякамі рэпрэсаваных беларускіх палітыкаў падчас аднадзённага візыту ў Менск 29 красавіка. На сустрэчы прысутнічалі маці зьніклага журналіста Зьмітра Завадзкага Вольга Рыгораўна Завадзкая, жонкі таксама зьніклых бязь вестак Віктара Ганчара і Анатоля Красоўскага, жонка экс-прэм’ера Беларусі Юлія Чыгір, а таксама нядаўна вызвалены з турмы былы дэпутат Вярхоўнага Савету 13-га скліканьня Андрэй Клімаў.

---

Аляксандар Лукашэнка зьняў з пасады аховы здароўя рэспублікі Ўладзіслава Астапенку. Падчас сёньняшняй нарады з урадам кіраўнік дзяржавы запатрабаваў ад міністра “покинуть зал заседания”. Вызваленьне міністра аховы здароўя адбылося пасьля таго, як Лукашэнка адрасаваў апошняму пытаньне “Сколько частных структур выселено из больниц и поликлиник?” і не атрымаў на яго, як перадае “Інтэрфакс”, патрэбнага адказу. Нагадаем, што апошнімі месяцамі, па загаду кіраўніка дзяржавы, сыстэму беларускай аховы здароўя рупліва правяраў Камітэт дзяржаўнага кантролю, што пацягнула за сабой шэраг гучных звальненьняў і распачынаньне крымінальных справаў датычна мэдыкаў.

---

Сядзячую забастоўку плянуюць правесьці 60 работнікаў гарадзенскага УП “Мэдык” ля будынку ўпраўленьня прадпрыемства. Так яны маюць намер пратэставаць супраць таго, што сёлета ім ні разу ня выплацілі заробак. Сёлета 300 работнікаў “Мэдыка” атрымалі за студзень і люты толькі па мінімальнаму спажывецкаму кошыку, які складае траціну ад сярэдняга заробку на прадпрыемстве. З-за хранічных нявыплат з пачатку году звольнілася 60 чалавек. Пра гэта www.praca.by паведаміў галоўны інжынер прадпрыемства Міхаіл Бандаровіч.

---

Працаўнікі калгасу "Дрыбінскі" Магілеўскай вобласьці вырашылі правесьці 30 красавіка гадзінны страйк перад будынкам райвыканкаму ў Дрыбіне. Калгасьнікі патрабуюць свае заробкі за люты і сакавік.

---

У пэрыяд з 28 красавіка па 2 траўня 2002 году ў Рэспубліцы Беларусь знаходзіцца зь візытам дэлегацыя кувэйцкага фонду арабскага эканамічнага разьвіцьця. У склад дэлегацыі КФАЭР уваходзяць намесьнік Генэральнага дырэктара кувэйцкага фонду арабскага эканамічнага разьвіцьця Абдулвахаб Аль-Бадэр і рэгіянальны мэнэджэр па краінах Цэнтральнай Азыі і Эўропы КФАЭР Валід Аль-Бахар. Асноўнай мэтай візыту зьяўляецца падпісаньне Крэдытнага пагадненьня паміж Рэспублікай Беларусь і КФАЭР па праекце рэканструкцыі заводу поліэфірных тэкстыльных ніцяў на РУП “Сьветлагорскае ВА “Хімвалакно”.

---

На полацкім вытворчым аб’яднаньні “Шкловалакно” пакуль ня будзе распачынацца працэс акцыянаваньня, аднак гэта плянуецца зрабіць пазьней. Пра гэта ў інтэрвію журналістам заявіў прэзыдэнт канцэрну “Белнафтахім” Іван Бамбіза. Паводле ягоных словаў, перадае БелаПАН, падключыць да працэсу акцыянаваньня ўсе прадпрыемствы нафтахімічнага комплексу краіны адразу немагчыма чыста фізычна.

---

Магілёўскі завод “БелаАЗ” выступіць заснавальнікам першага сумеснага прадпрыемства ў Кузбасе – вугольнага разрэзу. Ад Кемераўскай вобласьці сузаснавальнікам новага прадпрыемства стане разрэз “Задуброўскі”. Учора з Кемерава ў маскоўскае прадстаўніцтва саюзнай дзяржавы былі адпраўленыя праекты заснавальных дакумэнтаў на стварэньне расейска-беларускага вугальнага разрэзу ў Белаўскім раёне.

---

Адзін з арганізатараў Маршу Пратэсту 19 красавіка журналіст і мастак Мікалай Халезін ня можа адбываць 15-суткавы арышт з-за рэзкага пагаршэньня стану здароўя. Учора вечарам ягоны стан здароўя рэзка пагоршыўся - чалавек стаў задыхацца, ня мог спаць. На ягоную просьбу хаця б ненадоўга выйсьці на сьвежае паветра ахова адказала адмоваю. Аднак праз некаторы час да вязьня выклікалі “хуткую”, якая адвезла яго ў адзін са шпіталяў. Пасьля дадатковага абсьледваньня дактары парэкамэндавалі Халезіну амбуляторнае лячэньне. Гэтая просьба была задаволеная міліцэйскім начальствам, арыштанта ў спэцпрыёмнік на вуліцы Акрэсьціна не вярнулі. Зараз ён знаходзіцца на лячэньні дома, яму прапісаны пасьцельны рэжым.

---

Пытаньне аб другім ценявым бюджэце краіны было ўзьнятае яшчэ ў 1995-1996 гадах. Больш за тое, фракцыя “Грамадзянскае дзеяньне” у Вярхоўным Савеце 13-га скліканьня прымусіла пракуратуру правесьці расьсьледаваньні па фактах дзейнасьці “Торгэкспо” і фонду імя Эсамбаева. Выявіліся надзвычай цікавыя факты. Кіраўнік дзяржавы сваім распараджэньнем стварыў структуру, якая не плаціла падаткі, а атрыманыя грошы накіроўвала ў так званы прэзыдэнцкі фонд. І калі прыняць на ўвагу, што адзін час на “Торгэкспо” прыпадала ледзь не 25% усяго зьнешняга гандлю краіны, то можна уявіць, колькі сотняў мільёнаў даляраў не трапляла ў дзяржаўны бюджэт.

---

Вядомы беларускі кінарэжысэр Юры Хашчавацкі павінен сёньня выйсьці са спэцпрыёмніка-разьмеркавальніка пры ГУУС Менгарвыканкаму. 10 сутак арышту, да якіх рэжысэр быў прыгавораны за арганізацыю ў Менску Маршу пратэсту “ТАК ЖЫЦЬ НЕЛЬГА!”, скончваюцца 29 красавіка а 18.00. Сустрэць Юры Іосіфавіча да спцэпрыёмніка-разьмеркавальніка прыйдуць ягоныя сваякі, сябры, калегі, а таксама тыя, хто жадае выказаць падтрымку гэтаму мужнаму чалавеку. Нагадаем, что на сёньня ў камерах спэцпрыёмніка застаюцца яшчэ трое арганізатараў Маршу – Зьміцер Бандарэнка, Мікалай Халезін і Валеры Шчукін, якія былі прыгавораныя да 15 сутак арышту.

---

Дэлегацыя “Союза правых сил” на чале са старшынёй Палітрады партыі, лідэрам фракцыі СПС ў расейскай Дзяржаўнай Думе Барысам Нямцовым наведае Менск з аднадзённым візытам 29 красавіка. У склад дэлегацыі таксама ўвойдуць старшыня Выканкаму СПС Эльдар Янбухцін і група дэпутатаў Дзярждумы ад фракцыі СПС. У праграме візыту сустрэчы з кіраўніцтвам Аб’яднанай грамадзянскай партыі, жонкамі выкрадзеных і рэпрэсаваных палітыкаў.

---

23 красавіка ААТ “Газпром” накіравала тэлеграму на імя прэм’ер-міністра Беларусі Генадзя Навіцкага з ультыматумам аб скарачэньні паставак газу з 1 траўня на траціну. 25 красавіка міністар энэргэтыкі Беларусі Ўладзімер Сямашка зачытаў у парлямэнце тэкст ультыматуму: “Па стану на 1 красавіка 2002 году спажыўцам Рэспублікі Беларусь “Газпром” аддаў 3,9 млрд. кубамэтраў газу на суму $118,6 млн. Аплочана газу на суму $75,74 млн., ці 63,8%. У сувязі з выкладзеным прашу вас, паважаны Генадзь Васільевіч, навесьці належны парадак з плацяжамі за газ. У адваротным выпадку “Газпром” вымушаны будзе абмежаваць пастаўкі газу ў Рэспубліку Беларусь у пэрыяд 2002 г. на 25-30%.

---

У пятніцу Аляксандар Лукашэнка наведваў раёны Беларусі, што пацярпелі пасьля чарнобыльскай катастрофы і зрабіў сэнсацыйную заяву аб тым, што няблага было б набыць у літоўцаў Ігналінскую АЭС.

---

Аляксандар Лукашэнка даў загад “тщательно изучить вопросы целесообразности финансирования тех или иных чернобыльских программ в ныне существующих объемах”. Пра гэта ён заявіў падчас паездкі па Гомельскай вобласьці, якая найбольш пацярпела падчас катастрофы на чарнобыльскай АЭС. Са словаў беларускага лідэра, як перадае ІА “Росбалт”, перагляд павінен закрануць сацыяльную дапамогу жыхарам чарнобыльскіх тэрыторыяў, а таксама пытаньняў фінансаваньня аздараўленьня пацярпелага насельніцтва за межамі Беларусі. Камітэту дзяржаўнага кантролю дадзенае ўказаньне праверыць дзейнасьць “всех структур, связанных с чернобыльской тематикой”.

---

У Маскве ў аўтакатастрофе загінуў кінарэжысэр Міхаіл Пташук. Пташук Міхаіл Мікалаевіч (нарадзіўся ў 1943), беларускі кінарэжысэр, заслужаны дзеяч мастацтваў БССР (1982). Фільмы: “Вазьму твой боль” (1980), “Знак бяды” (1986), “Наш браняпоезд” (1989), “Кааператыў “Палітбюро”, ці Будзе доўгім разьвітаньне” (1992), “У жніўні 44-га” (2000).

---

За першы квартал 2002 году рэшткі гатовай прамысловай прадукцыі ў Беларусі вырасьлі з 750 мільярдаў рублёў да 1 трыльёну 48 мільярдаў рублёў. Пра гэта паведаміў віцэ-прэм’ер беларускага ўраду Андрэй Кабякоў. Зь ягоных словаў, перадае БелаПАН, павышэньне канкурэнтаздольнасьці ўласнай прадукцыі – галоўная праблема, якая зараз стаіць перад прадпрыемствамі прамысловасьці і АПК. Паводле дадзеных Кабякова, за першы квартал 2002 году рэнтабельнасьць беларускай прамысловасьці склала 6 адсоткаў. “Гэта вельмі мала. Але гэта рэальна. Гэта сапраўды тая рэальнасьць, якую мы маем насамрэч. Не інфляцыйная, не надзьмутая рэнтабельнасьць”, -- заявіў віцэ-прэм’ер.

---

Камітэт па гандлі азотнымі сумесямі ЗША 19 красавіка прадставіў у Мінгандаль ЗША прашэньне аб усталяваньні пошлінаў на карбамідна-аміячную сумесь (КАС) з Расеі, Беларусі, Украіны й Літвы. За 20 дзён пасьля падачы просьбы Мінгандаль ЗША павінен вырашыць, пачынаць расьледаваньне ці не. У выпадку станоўчага рашэньня працэдура разьбіральніцтва Мінгандлю ЗША па антыдэмпінгу на КАС пачнецца 9 траўня.

---