Вы находитесь на старой версии сайта "Хартия'97 - Новости Беларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
7 траўня спаўняецца 3 гады з дня зьнікненьня былога міністра ўнутраных справаў Беларусі генэрал-маёра міліцыі Юры Захаранкі. У гэты дзень у рамках правядзеньня агульнанацыянальнай кампаніі “Хочам ведаць праўду!” Аб’яднаная грамадзянская партыя праводзіць акцыі “Ланцуг неабыякавых людзей”. У Менску жывы ланцуг з партрэтамі выкрадзенага генэрала стане ў шэраг 7 траўня з 18.00 да 19.00 ад плошчы Незалежнасьці да Кастрычніцкай плошчы.
Высокапастаўленыя прадстаўнікі сарака чатырох краін сабраліся сёньня ў Вільні на двухдзённую сустрэчу Рады Эўропы. Чакаецца, што каля трыццаці краін-членаў гэтай арганізацыі, уключна зь Вялікабрытаніяй і Францыяй, падпішуць усебаковую забарону на сьмяротнае пакараньне. Дакумэнт забараняе сьмяртныя прысуды нават у ваенны час, ці калі пагроза вайны непазьбежная. Чатыры краіны, якія ўваходзяць у Раду Эўропы, фармальна захоўваюць сьмяротнае пакараньне ў сваім заканадаўстве, аднак прысуды не выносіліся зь дзевяностых гадоў. Беларусь, якая не ўваходзіць у Раду Эўропы, працягвае прыводзіць сьмяротныя прысуды ў выкананьне.
У вёсцы Кунцаўшчына (Менскі раён) зьнічтожана капліца рымска-каталіцкай царквы. Як паведаміў БелаПАН настаяцель менскага Чырвонага касьцёлу, ксёндз-магістар Уладзімер Завальнюк, пажар адбыўся ў ноч з 28 на 29 красавіка, прычым ён лічыць, што гэта быў падпал. Паводле словаў Уладзімера Завальнюка, першая спроба падпалу капліцы была зьдзейсьнена на каталіцкую пасху, якая адзначалася 31 сакавіка. “На гэты раз вандалы цалкам спалілі, зьнічтожылі і абрабавалі капліцу. Прычым, мясцовыя жыхары выклікалі міліцыю і пажарных, аднак яны не прыехалі і матывавалі сваё адмаўленьне адсутнасьцю бензіну. Пакуль не пабудуем касьцёл, будзем весьці служэньне пад адкрытым небам. Лічым, што гэта сумнае здарэньне сьведчыць аб маральным стане гармадзтва”, - сказаў Уладзіслаў Завальнюк.
У Пінску зьявіліся абразьлівыя надпісы на будынках, якія маюць адносіны да габрэйскага народу. Такія надпісы нанесеныя на сьценах сінагогі, памяшканьні будучай габрэйскай школы, а таксама на будынку гарадзкога аддзелу адукацыі – былой рэальнай вучэльні, які калісьці скончыў ураджэнец вёскі Моталь Іванаўскага раёну, першы прэзыдэнт Ізраілю Хаім Вэйцман. Ва ўсіх трох месцах невядомыя зрабілі фарбай аднолькавыя малюнкі -- фашыстоўскую свастыку і шыбеніцу з зацягнутай у вяроўцы шасьціканцовай зоркай, паведамляе “Брестский курьер”.
Праблема парушэньня ў Беларусі правоў працоўных зноў будзе ў цэнтры ўвагі на 90-ай сэсіі Міжнароднай арганізацыі працы (МАП), якая пачне працу ў чэрвені ў Жэневе. Паводле паведамленьня Федэрацыі прафсаюзаў Беларускай, пра гэта заявіў выканаўчы дырэктар сэктару па нарматывах, фундамэнтальных прынцыпах і правох на працоўным месцы пры Міжнароднай арганізацыі працы Кары Тапіола у выступе на форуме “Усход-Усход: асноўныя працоўныя нарматывы”, які праходзіў на мінулым тыдні ў Кіеве, паведамляе БелаПАН.
Працягвае падаць рэнтабельнасьць прадукцыі, прац і паслуг, якія рэалізуюцца беларускімі прадпрыемствамі, сьведчаць афіцыйныя дадзеныя Міністэрства статыстыкі і аналізу. У студзені-лютым яна склала 5,9 адсоткі супраць 9,8 за аналягічны пэрыяд мінулага году, пры гэтым у студзені яна была яшчэ больш нізкай – 5,1 адсоткі і павысілася за кошт лютаўскіх да 6,8 адсоткі, перадае БелаПАН.
Паводле дадзеных Міністэрства статыстыкі і аналізу, на 1 красавіка суадносіны запасаў гатовай прадукцыі да сярэднемесяцовага аб’ёму вытворчасьці склалі 76,6 адсоткі супраць 73,8 адсоткі на 1 сакавіка, 66,6 адсоткі на 1 лютага і 63,8 на 1 студзеня. Больш высокі ўзровень запасаў адзначаўся толькі на 1 сьнежня 1998 году - 77 адсоткаў і на 1 студзеня 1999 году - 85,3 адсоткі.
Бліжэйшы паплечнік Слабадана Мілошавіча, былы віцэ-прэм’ер Югаславіі Мікола Саіновіч дабраахвотна здаўся Міжнароднаму Гаагскаму трыбуналу. Яго абвінавачваюць у ваенных злачынствах, зьдзейсьненых у Косава ў 1999 годзе. Разам зь ім Гаагскаму трыбуналу здаўся і Момчыла Грубан, якога абвінавачваюць ў жорсткасьцях, дапушчаных у 1992 годзе ў лягеры для ваеннапалонных у Босьніі. Саіновіч і Грубан уваходзяць у сьпіс з 23 падазраваных у ваенных злачынствах, якія ўрад Югаславіі папрасіў дабраахвотна здацца ў Гаазе. Упершыню яны стануць перад судом ужо на наступным тыдні. На мінулым тыдні ў Гаагу прыбыў былы начальнік штабу югаслаўскай арміі генэрал Драгалюб Айжаніч.
Напярэдадні 3 траўня – Сусьветнага дня свабоды друку – міжнародная арганізацыя “Рэпарцёры бязь межаў” агучыла сваю штогадовую справаздачу аб сытуацыі са свабодай слова ў розных краінах сьвету. На думку аўтараў справаздачы, сытуацыя са свабодай беларускага друку была летась адной з горшых у сьвеце. У дакумэнце згадваюцца шматлікія факты ўціску й рэпрэсіяў датычна незалежных выданьняў.
Папярэджаньне Аб’яднанай грамадзянскай партыі вынесла Міністэрства юстыцыі Беларусі. Падставаю для папярэджаньня Мінюст палічыў артыкул старшыні партыі Анатоля Лябедзькі, апублікаваны ў газэце “Народная Воля” 27 красавіка. Артыкул меў назву “Вярніце скрадзенае!” і быў прысьвечаны другому ценявому бюджэту краіны. На думку Мінюста, гэты артыкул “закранае гонар і годнасьць кіраўніка дзяржавы, зьмяшчае грубыя пустаслоўныя паклёпніцкія выдумкі”. З тэкстам артыкулу Анатоля Лябедзькі вы можаце пазнаёміцца на нашым сайце.
Міністэрства абароны Вялікабрытаніі агучыла сьпіс краін, якія маюць балістычныя ракеты. Пры гэтым на думку брытанскага кіраўніцтва, з 28 краін, якія ўвайшлі ў гэты сьпіс, патэнцыйна пагражаюць толькі пяць – Іран, Ірак, Лібія, Сырыя, Паўночная Карэя, перадае IRNA.
Кіраўнік Камітэту дзяржкантролю Беларусі мяркуе, што ніякіх аб’ектыўных перадумоваў для невыкананьня ў першым кварталі важнейшых сацыяльна-эканамічных парамэтраў не было – ні кліматычных, ні палітычных, ні фінансава-эканамічных. Пра гэта старшыня камітэту Анатоль Тозік заявіў на нарадзе ў Аляксандра Лукашэнкі з удзелам членаў Савету міністраў.
Пасьля двухдзённай забастоўкі работнікі УП “Мэдык” атрымалі заробак за тры месяцы. Па загаду старшыні Гарадзенскага аблвыканкаму зараз рыхтуецца рашэньне аб ліквідацыі прадпрыемства, паведаміла намесьнік начальніка ўпраўленьня аховы здароўя Ларыса Зайцава.
З серады кошты на прыродны газ, які пастаўляецца на Беларусь, зьніжаныя да ўзроўню ўнутрырасейскіх, у прыватнасьці, да ўзроўню Смаленскай вобласьці. Да 1 траўня “Газпром” пастаўляў у Беларусь “блакітнае паліва” па кошце 30 даляраў ЗША за тысячу кубічных мэтраў. Унутрырасейскі тарыф на пастаўку газу ў Смаленскую вобласьць складае 21,17 даляраў за адну тысячу кубічных мэтраў.
, iнформэр
