Міжпрамбанк узяў “Славнефть” :: Хартыя'97 :: Навiны

У “Славнефти” адбыліся сур’ёзныя кадравыя зьмены, якія істотна зьмянілі становішча сілаў. Віцэ-прэзыдэнт “Славнефти” Андрэй Шторх паведаміў, што прэзыдэнт кампаніі Міхаіл Гуцырыеў, якога акцыянэры (уладальнік 75% акцыяў расейскі ўрад) 13 траўня зьбіраюцца на пазачарговым сходзе адправіць у адстаўку, да 31 траўня пайшоў у адпачынак. Адначасова Гуцырыеў прызначыў выконваючым абавязкі першага віцэ-прэзыдэнта “Славнефти” віцэ-прэзыдэнта “Роснефти” Анатоля Бараноўскага, чым адразу склаў на яго выкананьне абавязкаў прэзыдэнта кампаніі на пэрыяд свайго адпачынку.

Акрамя таго, выконваючым абавязкі віцэ-прэзыдэнта па эканамічных і фінансавых пытаньнях прызначаная Ніна Арэшкіна, што раней зьяўлялася намесьнікам кіраўніка Міжпрамбанку, а шэраг іншых супрацоўнікаў гэтага банку прызначаныя дарадцамі прэзыдэнта “Славнефти”, у прыватнасьці, па юрыдычных, эканамічных і іншых пытаньнях. Такім чынам прадстаўнікі Міжпармбанку на чале з Бараноўскім узялі кампанію пад свой поўны кантроль. Галоўнае пытаньне, аднак, у тым, ці ўдасца ім яго захаваць пасьля сходу акцыянэраў 13 траўня.

Анатоль Бараноўскі, як ужо паведаміла “Газета.Ru”, зьяўляецца адным з прэтэндэнтаў на прызначэньне паўнапраўным прэзыдэнтам кампаніі на пазачарговым сходзе акцыянэраў “Славнефти”. Яго кандыдатуру Міжпрамбанк пры судзеяньні дзяржсакратара “саюзу” Расеі й Беларусі здолеў правесьці праз Мінэканомікі Беларусі, якое кіруе 10,8% акцыяў нафтавай кампаніі. Ад расейскага ўраду прапанаваная кандыдатура віцэ-прэзыдэнта “Славнефти” Юрыя Суханава, які зараз у адпачынку і лічыцца чалавекам уладальніка “Сибнефти” Рамана Абрамовіча.

Відавочна, кантроль над кампаніяй не дапаможа Міжпрамбанку прымусіць акцыянэраў, якім прэм’ер Міхаіл Касьянаў даў дырэктыву забясьпечыць прызначэньне Суханава, галасаваць інакш на сходзе акыянэраў 13 траўня. З іншага боку, гэта дае банку як мінімум лішкавыя два тыдні часу. Расейскі КзоТ, як вядома, забараняе звальняць чалавека, які знаходзіцца ў адпачынку ці на бальнічным. Такім чынам, юрыдычна Гуцырыеў можа пакінуць сваю пасаду не раней за 1 чэрвеня. Але ж ён можа яшчэ захварэць. Зацягваньне пытаньня аб прэзыдэнце “Славнефти” можа паспрыяць Міжпрамбанку. У некаторых маскоўскіх палітычных колах лічыцца, што становішча прэм’ер-міністра Касьянава зараз няўстойлівае як ніколі. Сёньняшняя зьмена дыспазыцыі ўнутры нафтавай кампаніі, магчыма, як раз і разьлічаная на тое, каб дачакацца зьняцьця кіраўніка ўраду. А новы прэм’ер дырэктыву па “Славнефти” можа зьмяніць – у Міжпрамбанка зь піцерскімі сілавікамі, як вядома, адносіны сяброўскія.

Іншыя крыніцы “Газеты.Ru” кажуць пра іншае разьвіцьцё падзеяў. На іх думку, міжпрамбанкаўскі мэнэджмэнт “Славнефти” спрабуе проста сарваць сход акцыянэраў 13 траўня. Для гэтага заўсёды ёсьць маса розных магчымасьцяў - ад страты бюлятнёў для галасаваньня да недапушчальнасьці па розных прычынах месца правядзеньня сходу. Гэта, дарэчы, Акадэмія дзяржслужбы пры прэзыдэнце.