ЗША занепакоеныя ўціскам прэсы й свабоды сходаў на Беларусі :: Хартыя'97 :: Навiны

Давераны ў справах ЗША Дуглас Дэвідсан выступіў 25 красавіка перад Сталай Радай АБСЭ і выказаў занепакоенасьць нядаўнім разгонам у Менску мірнага шэсьця Марш Пратэсту і ўціскам свабоды слова ў краіне . Далей падаем тэкст выступу цалкам:

“Сп.Старшыня, павага свабоды слова й сходаў зьяўляюцца асноўнымі прынцыпамі АБСЭ і адыгрываюць галоўную ролю ў разьвіцьці дэмакратычных інстытутаў.

У сьвятле вышэйзгаданага, мы хочам выказаць занепакоенасьць адносна нясупыннага перасьледу незалежнай прэсы й мірных дэманстрацыяў на Беларусі. Такая практыка супярэчыць абавязацельствам АБСЭ, падрывае грамадзянскую супольнасьць, а таксама здольнасьць Беларусі падтрымліваць нармальныя стасункі з іншымі дзяржавамі.

12 красавіка ўвага прадстаўніка АБСЭ па свабодзе СМІ і Сталай Рады была прыцягнутая да перасьледу незалежных журналістаў і закрыцьця незалежнай газэты “Пагоня”.

19 красавіка спэцпадразьдзелы МУС арыштавалі прыкладна 100 чалавек за ўдзел у дэманстрацыі, якая праводзілася беларускімі незалежнымі арганізацыямі ЗУБР і Хартыя’97 у знак пратэсту супраць нізкага ўзроўню жыцьця ў краіне. Згодна афіцыйных дадзеных, дэманстранты былі прыгавораныя да 3-15 дзён арышту, а яшчэ дзесяць атрымалі штрафы ў памеры ад 200.000 да 1.700.000 рублёў.

Сп.Старшыня, міжнародныя арганізацыі, уключна з АБСЭ, віталі фармаваньне на Беларусі грамадзянскай супольнасьці пасьля верасьнёўскіх прэзыдэнцкіх выбараў. Безупынныя атакі на грамадзяскую супольнасьць, толькі адцягваюць пэрспэктыву пераўтварэньня Беларусі ў рэальнае дэмакратычнае грамадзтва.

18 красавіка сакаратар Кубіс адзначыў права Старшыні на прызначэньне адмысловага прадстаўніка згодна дакумэнтам АБСЭ і шматгадовай практыкі.

Прызначэньне Старшынём амбасадара Хайкена ў якасьці адмысловага прадстаўніка па пытаньнях супрацоўніцтва зь Беларусяй адлюстроўвае намеры добрай волі збоку Старшыні па ўмацаваньні дачыненьняў паміж АБСЭ і Беларусяй, у духу супрацоўніцтва й канструктывізму на прыкладзе місіі АБСЭ ў Беларусі.

Беларусь заяўляла аб сваёй прыхільнасьці да пэрманентнага супрацоўніцтва з АБСЭ, а таксама з Кансультатыўна-назіральнай групай (КНГ). Аднак толькі рэальныя крокі Беларусі ў адказ на дзеяньні Старшыні змогуць пераканаць міжнародную супольнасьць, прычым ня толькі тут у Вене, але і паўсюль, у тым, што Беларусь падзяляе імкненьне да супрацоўніцтва”.