Рада Эўропы ня выключае ўвядзеньня санкцыяў да Беларусі :: Хартыя'97 :: Навiны

Пасежданьне Палітычнага камітэту Рады Эўропы, на якім выступіла люксембургскі віцэ-прэм’ер і міністар замежных справаў Лідзія Полфер, скончылася ўчора ўвечары ў Люксембургу. Беларуская праблема будзе адным з прыярытэтных пытаньняў за шасьцімесяцовае старшынства Вялікага герцагства Люксембургу ў Камітэце міністраў Рады Эўропы. У люксембургскім паседжаньні удзел прымаў адмысловы дакладчык ПАРЭ па Беларусі Вольфганг Бэрэндт. Паседжаньне паліткамітэту было закрытым для прэсы, і тэксты выступаў на ім ня будуць агучаныя, аднак Радыё Свабода ўдалося даведаццца, што на гэтым паседжаньні абмяркоўвалася магчымасьць увядзеньня санкцыяў супраць Беларусі, якая цягам шасьці гадоў ня можа разьвязаць канфлікт з эўрапейскімі арганізацыямі, што распачаўся з рэфэрэндуму 1996 году.

У Люксембургу прадстаўнікі заканадаўчай часткі Рады Эўропы – а менавіта палітычны камітэт Парлямэнцкай асамблеі – сустрэліся з кіраўніком выканаўчай структуры - Камітэту міністраў Рады Эўропы. Гэты камітэт з 3 траўня наступныя паўгода ачольвае міністар замежных справаў Люксембургу Лідзія Полфер. Прадстаўніца люксембургскага МЗСу ў справах Рады Эўропы Флорэнс Энш у інтэрвію Радыё Свабода паведаміла наступнае:

“Сп.Полфер спачатку прадставіла прыярытэты люксембургскага старшынства ў Камітэце міністраў Рады Эўропы. І гэта таксама ўключала агляд сытуацыі ў некалькіх краінах, якія палітычна найбольш праблемныя. У лік гэтых краін уваходзіць Беларусь.

Сытуацыя ў Беларусі разглядалася камітэтам, і міністар абмеркавала з камітэтам шляхі й сродкі аднаўленьня кантактаў зь Беларусяй. У сувязі з гэтым падкрэсьлівалася, што найбольш важным зьўляецца захаваньне адзінства і пасьлядоўнасьці міжнароднай рэакцыі на сытуацыю там”.

Таксама стала вядома, што старшыня Камітэту міністраў Рады Эўропы Лідзія Полфер не зьбіраецца наведваць Беларусь за тэрмін свайго знаходжаньня на гэтай пасадзе. Гэта азначае, што абмежаваньне на кантакты з афіцыйным Менскам на высокім узроўні застаюцца ў сіле.