Беларусь ставіць бар’еры на шляху расейскіх тавараў :: Хартыя'97 :: Навiны

Міністар сельскай гаспадаркі Беларусі Міхаіл Русы неяк узяўся патлумачыць, што расейскае мяса неканкурэнтназдольнае ў параўнаньні зь беларускім. Таму суседзі ўсталявалі цесныя кантакты з трэцімі краінамі. Расейцы, каб зьнізіць сабекошт, завозяць мяса з Аўстраліі й Бразыліі, перапрацоўваюць яго ў сябе, пасьля чаго і прадаюць у Беларусь. Прысутнасьць расейскага харчаваньня ў крамах стала вельмі заўважным, на што ў некаторых рэгіёнах Беларусі ёсьць указаньне: перапісаць цэньнікі і прыбраць зь іх пазначэньне краіны-вытворцы, каб у грамадзян не было лішніх пытаньняў. Існуюць і больш радыкальныя рашэньні.

Так, імпарцёрам піва беларускія ўлады няспынна робяць сюрпрызы. Спачатку была прынятая пастанова, што пры ўвозе кожнай партыі на тэрыторыю Беларусі пастаўшчык павінен пакінуць дзяржорганам заклад за тару, які вяртаецца, калі яна перасякае мяжу ў зваротным напрамку. Затым было рашэньне выдаваць не генэральныя ліцэнзіі на імпарт піва, а разавыя, прычым такса была ўсталяваная ў памеры прыкладна 35% ад сабекшту прадукта. Але падалося, што і гэтага не дастаткова. Хутка ў замежнага піва на Беларусі будуць патрабаваць аўсвайс, акцызную марку. Прычым ганаровы абавязак набыць яе і наляпіць на кожную бутэльку ўскладаецца на пастаўшчыка.