Віцэ-прэзыдэнта “ЛУКОЙЛА” хавалі ў Беларусі :: Хартыя'97 :: Навiны

Перашга віцэ-прэзыдэнта кампаніі “ЛУКОЙЛ” Сяргея Кукуру выкрадальнікі хавалі ў закінутай беларускай вёсцы, паведамляе ў аўторак газэта “Известия”. Па зьвестках “Известий”, Кукуру першыя паўтара дня пасьля захопу трымалі ў Падмаскоўі, а пасьля таго, як выкрадальнікі запісалі на відэастужку зварот закладніка з просьбай выплаціць 3 мільёны даляраў і тры мільёны эўра, пераправілі на тэрыторыю Беларусі. Віцэ-прэзыдэнта “ЛУКОЙЛ” трымалі ў сутарэньнях бярвенчатага зрубу.

25 верасьня Кукуру, папярэдне з надзетым яму на галаву мехам, пасадзілі ў машыну, везьлі дзьве гадзіны і высадзілі на лясной дарозе. Выкрадальнікі загадалі Кукуры прачакаць 15 хвілінаў на збочыне, дабірацца да Масквы сваім шляхам і не зьвяртацца ў мясцовую міліцыю, паведамляе газэта са спасылкаю на сьведчаньні віцэ-прэзыдэнта “ЛУКОЙЛу”, дадзеныя ім супрацоўнікам праваахоўчых органаў.

Пехам Сяргей Кукура дабраўся да бліжэйшага населенага пункту – гэта была вёска Сешча Бранскай вобласьці, разьмешчаная непадалёк ад мяжы зь Беларусяй. Там ён сеў на электрычку, выйшаў на нейкай станцыі і ўзяў таксі, кіроўца якога пагадзіўся адвезьці Кукуру ў Маскву за 100 даляраў.

Таксовец прывёз Сяргея Кукуру не ў пасёлак “ЛУКОЙЛу” ва Ўнукава, а на іншую дачу віцэ-прэзыдэнта -- у Галіцына. Пасьля разьліку з кіроўцам, Сяргей Кукура папрасіў камэнданта дачнага кааператыву давезьці яго да пасёлка “ЛУКОЙЛу”, паведамляюць “Известия”.

У панядзелак агенцтва “Известия” паведамілі, што ў выкраданьні першага віцэ-прэзыдэнта кампаніі “ЛУКОЙЛ” Сяргея Кукуры праваахоўчыя органы падазраюць былога афіцэра ўзброеных сілаў, ваеннага будаўніка Аляксандра Ветлугаева і былога дэсантніка, раней судзімага за разбой, Сяргея Мельчакоўскага.

У аўторак начальнік ГУБАЗ МУС Расеі Аляксандар Аўчыньнікаў будзе выступаць перад журналістамі са справаздачай пра ход сьледзтва па справе аб выкраданьні першага віцэ-прэзыдэнта “ЛУКОЙЛу”.