Прымусовыя паборы на “будоўлю стагодзьдзя” :: Хартыя'97 :: Навiны

Сёньня Агульнанацыянальная тэлевізія (ОНТ) праводзіць тэлемарафон па збору сродкаў на будаўніцтва новага будынку Нацыянальнай бібліятэкі Рэспублікі Беларусь. Аўтары праекту сьцьвярджаюць, што ахвяраваньні на будаўніцтва бессэноўна вялізнага кнігасховішча павінны быць выключна добраахвотным. Тым часам у інтэрнэце на форумах зьяўляецца наступная інфармацыя: “Спадарства! Як вам падабаецца?! Прыходзіць дачка з гімназіі і кажа: тата, у школе сказалі здаць па 500 рублёў на будаўніцтва бібліятэчкі...”; “З заробку работнікаў бібліятэк адлічваюць па 20% на будаўніцтва бібліятэкі”.

Такія паведамленьні ўжо налічваюцца дзясяткамі. Падаем некаторыя зь іх.

“Нам загадана здаць па 30 тысяч – начальнікам аддзелаў, аднадзённы заробак -- усім астатнім. Звар’яцець, зусім абнахабіліся. У мяне за кватэру 3 месяцы не заплочана, а тут... Прычым “адмазкі” не прымаюцца...

Вось ужо заяву пішу, прычым абавязкова ад рукі, тэкст кшталту – прашу пералічыць на будаўніцтва ...і г.д. зараз паглядзеў, у мяне атрымалася 8560р. Шкада шэфа, ён піша заяву на пералічэньне 30000р.”

“На дзяржпрадпрыемстве, калі ня будзеш падпарадкоўвацца, могуць у лепшым выпадку пазбавіць усіх прэміяў і надбавак – больш ня маюць права, а хутчэй за ўсё, калі заўпарцішся, выклікаюць і папросяць, каб “па асабістым” аб сыходзе напісаў.

Да і ў нас, на прыватнай фірме ўжо сёньня размову заводзілі, ці ня варта самім пералічыць трошкі, пакуль не запатрабавалі значна болей”.

“Што там на працы! У маёй малой у дзіцячым садку зьбіраюць грошы на будаўніцтва бібліятэкі”.

“Учора, як прыйшоў у лябараторыю, даведаўся ад навуковага кіраўніка: вышэйшае кіраўніцтва нашага унівэру (БДУІР) скінула загад, каб усе штатныя супрацоўнікі напісалі заявы аб добраахвотным пералічэньні часткі свайго заробку ў фонд будаўніцтва нацыянальнай бібліятэкі. Сума не агаворвалася. Наш шэф загадаў нам пісаць гэтыя заявы з пазначэньнем сумы, трохі большай за МСК. Сёньня ўсплылі некаторыя падрабязнасьці: Лукашэнка ўсіх пастроіў, пасьля гэтага кіраўніцтва пачало адлічэньні: рэктар -- цалкам аклад, прарэктары – па палове аклада... пасьля чаго ўсе з дакорам паглядзелі у бок дэканаў... Словам, ланцужок пайшоў...”

“У студэнтаў БДУ са стыпендыі адлічаюць па 50 рублёў на будаўніцтва бібліятэкі”.

“Заўтра каля ўнівэрсаму “Першамайскі (Уручча) выкладчыкі СШ №45 пачаргова (па гадзіне) будуць стаяць з працягнутай рукой, зьбіраючы сродкі на будаўніцтва бібліятэкі. Як заўсёды ў добраахвотна-прымусовым парадку, па загаду зьверху”.

Гэтую тэму можна абмеркаваць на форуме нашага сайту.