У Менску праходзiць пасяджэньне беларуска-іранскай камісіі :: Хартыя'97 :: Навiны

Беларусь і Іран сумеснымі намаганьнямі будуюць “пасьлядоўныя і канструктыўныя” гандлёва-эканамічныя стасункі. Пра гэта заявіў у чацьвер міністар прамысловасьці Беларусі Анатоль Харлап, адкрываючы ў Менску чарговае пасяджэньне міжурадавай беларуска-іранскай камісіі па гандлёва-эканамічным супрацоўніцтве.

Харлап выказаў упэўненасьць у тым, што праца камісіі, якую зь іранскага боку ачольвае міністар гандлю гэтай краіны Мохамад Шарыатмадары, створыць “яшчэ больш моцныя перадумовы для дынамічнага разьвіцьця стасункаў паміж двума дзяржавамі ня толькі ў эканамічнай сфэры, але і ў іншых абласьцях”.

У сваю чаргу, першы намесьнік міністра замежных справаў Беларусі Васіль Пугачоў у інтэрвію журналістам паведаміў, што іранскі бок выказвае зацікаўленасьць у стварэньні сумесных вытворчасьцяў па зборцы ў Іране трактараў МТЗ і грузавых аўтамабіляў МАЗ. “Па МТЗ ужо есьць сур’ёзныя прапрацоўкі, на такі самы канструктыўны ўзровень выходзяць намеры Ірана адносна зборкі МАЗаў”, -- удакладніў Пугачоў. Акрамя таго, паводле ягоных словаў, Іран праяўляе зацікаўленасьць у супрацоўніцтве зь беларускімі прадпрыемствамі ў сфэры мікраэлектронікі, у прыватнасьці, з НВА “Інтэграл”.

Першы намесьнік міністра паведаміў, што ў 2003 годзе чакаецца візыт у Беларусь прэзыдэнта Ірана Мохамада Хатамі. Дыплямат выказаў меркаваньне, што ў час гэтага візыту будзе падпісаны шэраг важных двухбаковых дакумэнтаў. “У нас ёсьць напрацоўкі па 4-5 такіх дакумэнтах”, -- сказаў Пугачоў і не ўдакладніў, аднак, менавіта пра якія дакумэнты ідзе размова.

У прэсавай службе беларускага МЗС "Медиафакту" паведамілі, што, як чакаецца, галаву іранскай дэлегацыі М.Шарыатмадары будзе прымаць Аляксандар Лукашэнка. Акрамя таго, заплянаваныя перамовы з кіраўніком МЗС Міхаілам Хвастовым, міністрам гандлю Аляксандрам Кулічковым, міністрам транспарту й камунікацыяў Міхаілам Баравым і міністрам сельскай гаспадаркі Міхаілам Русым.