МЗС просіць Літву не сьпяшацца з увядзеньнем больш жорсткай візавай палітыкі :: Хартыя'97 :: Навiны

Больш жорсткая візавая палітыка Літвы адмоўна паўплывае на разьвіцьцё добрасуседзкіх адносінаў зь Беларусяй, ускладніць узаемныя паездкі грамадзян дзьвюх краін. Пра гэта заявіў 3 кастрычніка на прэсавай канфэрэнцыі ў Менску намесьнік міністра замежных спраў Беларусі Аляксандар Герасіменка.

Ён нагадаў, што 25 верасьня 2002 году МЗС Літвы заявіў аб дэнансацыі беларуска-літоўскіх часовых пагадненьняў аб узаемных паездках грамадзян і больш спрошчаным парадку пропуску памежнага насельніцтва праз дзяржаўную мяжу. Літоўскі бок аб’явіў і канкрэтную дату ўвядзеньня поўнамаштабнага візавага рэжыму зь Беларусяй – 1 студзеня 2003 году. “Крокі нашых суседзяў накіраваныя на фактычнае абмежаваньне права грамадзян на свабоду перасоўваньня і вядуць да зьяўленьня новых лініяў падзелу ў Эўропе”, -- заявіў Аляксандар Герасіменка. Беларусь лічыць, што гэтыя рашэньні супярэчаць духу і палажэньням асноўных дакумэнтаў АБСЭ, у прыватнасьці, Гэльсінскаму выніковаму акту нарады па бясьпецы й супрацоўніцтву ў Эўропе 1975 году.

Аляксандар Герасіменка паведаміў, што Літва тлумачыць сваю пазыцыю ўступленьнем у ЭЗ і Шэнген. Аднак, са словаў Герасіменкі, часовая пэрспэктыва далучэньня Літвы да Шэнгенскага пагадненьня ня вызначаная. “За гэты час шмат што можа зьмяніцца. Тым больш, што Расея зараз актыўна працуе з ЭЗ па калініградзкай праблеме, -- патлумачыў Аляксандар Герасіменка.— Магчыма, праз два-тры гады зьявіцца адзіная прастора на ўсёй эўрапейскай тэрыторыі”.

Як лічыць намесьнік кіраўніка беларускага МЗС, Літва неабгрунтавана сьпяшаецца з увядзеньнем поўнамаштабных візавых адносінаў зь Беларусяй. Беларускі бок прапануе Літве, пакуль яшчэ ня вырашана пытаньне ўступленьня ў Шэнгенскае пагадненьне, пакінуць ранейшыя ўмовы перасоўваньня насельніцтва праз мяжу.