Літва прапануе Беларусі новыя правілы перасячэньня мяжы :: Хартыя'97 :: Навiны

МЗС Літвы ў пятніцу перадаў амбасадам Расеі й Беларусі ноты, у якіх афіцыйна інфармуе аб прынятым на мінулым тыдні рашэньні дэнансаваць часовыя пагадненьні аб узаемных бязьвізавых паездках.

Як паведамляе МЗС, у нотах таксама выкладзена прапанова заключыць новыя пагадненьні. Гэтым завяршылася юрыдычная працэдура дэнансацыі пагадненьняў. Яны страцяць сілу з 1 студзеня 2003 году.

Міністэрства таксама прапанавала расейскім і беларускім дыпляматам распачаць перамовы аб новых часовых пагадненьнях, якія б адпавядалі патрабаваньням Эўразьвязу, і ў якіх былі б прадугледжаныя ільготы пры выдачы візаў міжнародным перавозчыкам, прадстаўнікам культуры, мастацтва, спорту, а таксама асобам ва ўзросьце старэй за 60 гадоў.

Для выкананьня дадзеных Эўразьвязу абяцаньняў ўрад Літвы 25 верасьня вырашыў дэнансаваць падпісанае ў 1995 годзе з Расеяй часовае пагадненьне аб узаемных паездках грамадзян, а таксама аб больш спрошчаным перасячэньні дзяржмяжы памежных раёнаў.

Так Літва выконвае абавязацельствы, прынятыя на перамовах аб членстве ў Эўразьвязе па разьдзелу “Заканадаўства і ўнутраныя справы”. Літва са студзеня наступнага году адмяняе разавыя ільготы для расейцаў, якія перасякаюць Літву чыгункай, а з 1 ліпеня 2003 году візы спатрэбяцца і тым жыхарам Калінінградзкай вобласьці, якія едуць у Літву ці едуць па яе тэрыторыі аўтатранспартам. Таксама з 1 студзеня 2003 году будуць адмененыя візавыя ільготы для некаторых груп грамадзян Беларусі – пэнсіянэраў, жыхароў памежных раёнаў і перавозчыкаў.

Літва пайшла на такія меры, каб далучыцца да прасторы Шэнгенскага пагадненьня, якое рэглямэнтуе свабоднае перасоўваньне ў межах краін-членаў пагадненьня.

У ноце, перададзенай амбасадзе Расеі, паведамляецца, што ўрад вырашыў да 1 ліпеня наступнага году дазволіць бязьвізавы праезд у Літву сталым жыхарам Калінінградзкай вобласьці.

У праекце пагадненьня прапаноўваецца ўсталяваць новы парадак выдачы доўгатэрміновых і танных візаў для літоўскіх грамадзян, якія едуць у Калінінградзкую вобласьць і жыхароў расейскага анклаву, што накіроўваюцца ў Літву.

Менску Літва прапануе заключыць пагадненьне аб выдачы бясплатных візаў для грамадзян старэй за 60 гадоў, жыхарам памежных раёнаў, спартоўцам, дзеячам культуры й мастацтва. Калі беларускі бок пагодзіцца, то міжнародным перавозчыкам будуць выдавацца шматразовыя візы, для выдачы якіх не спатрэбяцца запрашэньні.

Новыя пагадненьні могуць уступіць у сілу з пачатку наступнага году.