Барацьба з карупцыяй набірае рух :: Хартыя'97 :: Навiны

Нарада з удзелам дзяржаўнага сакратара Рады Бясьпекі Генадзя Нявыгласа, старшыні Камітэту дзяржаўнага кантролю Анатоля Тозіка, генэральнага пракурора Віктара Шэймана, памочніка прэзыдэнта Сяргея Ткачова й начальніка ўпраўленьня па барацьбе з арганізаванай злачыннасьцю Пракуратуры рэспублікі Валянціна Нікіціна правёў 5 кастрычніка Аляксандар Лукашэнка.

Як паведаміла прэсавая служба кіраўніка дзяржавы, падчас нарады, якая цягнулася больш за чатыры гадзіны, Лукашэнка заслухаў справаздачы Генадзя Нявыгласа, Анатоля Тозіка й Віктара Шэймана пра ход расьследаваньня шэрагу крымінальных спраў пад ягоным кантролем. У прыватнасьці, асаблівая ўвага была надзелена дакладам па крымінальных справах, датычных дзейнасьці асобных камэрцыйных структур у цэлюлозава-папяровай прамысловасьці ў Гомельскай вобласьці.

У час нарады канстатаваліся факты датычнасьці некаторых службовых асоб, у тым ліку супрацоўнікаў праваахоўчых органаў, да лябіраваньня інтарэсаў камэрцыйных структур.

У мэтах вывучэньня прычын неналежнага расьсьледаваньня крымінальных спраў аб злоўжываньнях у цэлюлозава-папяровай прамысловасьці й падрыхтоўкі прапаноў па выкараненьні фактаў лябіраваньня інтарэсаў камэрцыйных структур з боку службовых асоб органаў дзяржаўнага кіраваньня й праваахоўчых органаў, распараджэньнем Лукашэнкі створаная дзяржаўная камісія. Ейным старшынём прызначаны старшыня Камітэту дзяржаўнага кантролю Анатоль Тозік. Дзяржаўная камісія надзеленая самымі шырокімі паўнамоцтвамі, у тым ліку па частцы каардынацыі працы праваахоўчых органаў па распачынаньні й расьследаваньні крымінальных спраў у сфэры цэлюлозава-папяровай прамысловасьці. Аб выніках працы камісіі Анатоль Тозік распавядзе галаве дзяржавы да 15 сьнежня 2002 году.

Як стала вядома БЕЛТА, за неналежную арганізацыю расьсьледаваньня крымінальных спраў па фактах парушэньняў у цэлюлозава-папяровай прамысловасьці на пэрыяд працы дзяржаўнай камісіі ад выкананьня абавязкаў адхіленыя намесьнік міністра ўнутраных спраў -- начальнік Сьледчага камітэту МУС генэрал-маёр міліцыі Леанід Глухоўскі й начальнік упраўленьня Камітэту па барацьбе з арганізаванай злачыннасьцю й карупцыяй МУС па Гомельскай вобласьці палкоўнік міліцыі Ўладзімер Карцаў.