Пратэстанты просяць Лукашэнку ня ўводзіць царкоўную цэнзуру :: Хартыя'97 :: Навiны

Вернікі пратэстанцкай евангельскай канфэсіі Рэспублікі Беларусь зьвярнуліся з адкрытым лістом да Аляксандра Лукашэнкі, у якім выказалі просьбу не дапусьціць ажыцьцяўленьня дыскрымінацыйных палажэньняў Закону “Аб унясеньні зьменаў у Закон Рэспублікі Беларусь “Аб свабодзе рэлігійнага вераспавяданьня й рэлігійных арганізацыях”, што цягне за сабой дэстабілізацыю рэлігійнага міру й згоды ў Беларусі. Чытайце тэкст звароту, падпісанага кіраўнікамі чатырох евангельскіх канфесій Беларусі.

Паважаны Аляксандар Рыгоравіч!

2 кастрычніка 2002 году Савет Рэспублікі Нацыяналнага сходу Рэспублікі Беларусь ухваліў Закон Рэспублікі Беларусь “Аб унясеньні зьменаў у Закон Рэспублікі Беларусь “Аб свабодзе рэлігійнага вераспавяданьня і рэлігійных арганізацыях”. Мы неаднаразова зьвярталі ўвагу, што дадзены закон утрымлівае шэраг дыскрымінацыйных палажэньняў, якія неабгрунтавана абмяжоўваюць правы грамадзян нашай краіны на свабоду вераспавяданьня.

Цягам году, з моманту ўнясеньня праекту дадзенага закона ў заканадаўчы орган, выказаныя намі пярэчаньні засталіся цалкам незаўважанымі: ні разу на абмеркаваньне праекту не былі запрошаныя прадстаўнікі нашай канфэсіі. У такой сытуацыі немагчыма разьлічваць на тое, што дэпутаты абедзьвюх палат маглі пачуць і ўлічыць думкі і інтарэсы прадстаўнікоў усіх вераспавяданьняў.

Нашыя цэрквы робяць немалы ўзьнёсак у духоўнае адраджэньне грамдзтва, ажыцьцяўляюць вялікую добраахвотную і сацыяльную працу. Аднак Закон стварае сур’ёзныя перашкоды для далейшага ажыцьцяўленьня стваральнай дзейнасьі нашых цэркваў, парушае міжканфэсійны балянс.

Гісторыя нашай краіны сьведчыць, што традыцыі верацярплівасьці й талерантнасьці былі блаславеньнем як для дзяржавы, так і для кожнага яе грамадзяніна. Зьвяртаючыся да Вас, як да гаранта канстытуцыйных правоў, просім не дапусьціць увядзеньня ў дзеяньне дыскрымінацыйных палажэньняў Закону і тым самым ліквідаваць перадумовы для ўзьнікненьня дэстабілізацыйнага рэлігійнага міру й згоды ў нашай краіне.

Ад Саюза Евангельскіх Хрысьціян-баптыстаў у Рэспубліцы Беларусь

Япіскап Н.В.Сінкавец

Ад Саюзу Хрысьціян Веры Евангельскай у Рэспубліцы Беларусь

Япіскап С.С.Хоміч

Ад Аб’яднаньня супольнасьцяў Хрысьціян Поўнага Евангельля ў Рэспубліцы Беларусь

в.а. прэзыдэнта В.Л.Ганчарэнка

Ад Рэлігійнага Аб’яднаньня

“Канфэрэнцыя цэркваў хрысьціян Адвентыстаў Сёмага Дня” ў Рэспубліцы Беларусь

Прэзыдэнт М.І.Астроўскі