 | ПАЛIТЫКА | |
Ці застанецца ў Беларусі місія АБСЭ?
11:22, 08/10/2002
На гэтым тыдні будзе вырашаны лёс місіі АБСЭ ў Беларусі. Пра гэта заявіла ў інтэрвію БелаПАН першы сакратар Кансультатыўна-назіральнай групы (КНГ) АБСЭ ў Менску Аліна Жасан. Паводле ейных словаў, на гэтым тыдні павінны пачацца перамовы прадстаўнікоў АБСЭ зь беларускім урадам, і далейшы лёс КНГ АБСЭ ў Беларусі будзе залежыць ад вынікаў перамоваў. Сп-ня Жасан распавяла, што тэрмін дзеяньня ейнай акрэдытацыі ў Беларусі завяршаецца 29 кастрычніка. 
11:21, 08/10/2002, GazetaSNG.ru
Ініцыятыва Ўладзімера Пуціна перадаць пасаду старшыні Рады кіраўнікоў дзяржаваў СНД Украіне і пачаць, такім чынам, даўно чаканую ратацыю на гэтай пасадзе, атрымала на ўчорашнім саміце нечакана жорсткі адпор.
11:20, 08/10/2002
Паводле дадзеных Аб’яднанага савету прадпрымальнікаў, агульнанацыянальная забастоўка прадпрымальнікаў працягваецца ў большасьці рэгіёнаў Беларусі.
11:19, 08/10/2002
“Дастаткова беспасьпяховай” назваў спробу зьбліжэньня Расеі зь Беларусяй прэзыдэнт расейскага Інстытута стратэгічных ацэнак Аляксандар Канавалаў 7 кастрычніка ў інтэрвію інтэрнэт-рэсурсу “Страна.Ru”. Акрамя таго, на яго думку, паміж расейцамі й беларусамі ёсьць тэндэнцыя разьдзяленьня, а не зьбліжэньня.
11:18, 08/10/2002, "The Wall Street Journal"
Атрыманыя ўрадам ЗША пацьверджаньні, што прэзыдэнт Украіны Леанід Кучма насуперак санкцыям ААН ухваліў продаж Іраку радыёлякацыйнай сыстэмы супрацьпаветранай абароны, фундамэнтальна зьмянілі адносіны Амэрыкі з Украінай.
11:17, 08/10/2002, Валеры Шчукін, “Народная Воля”
У рэдакцыю “Народнай Волі” патэлефанавала дама і абурана паведаміла, што ў настаўнікаў забіраюць дзённы заробак нібыта на будаўніцтва бібліятэкі. А ў педагогаў грошай на дабрачыннасьць няма. За тлумачэньнямі зьвярталася і ў гарадзкі аддзел адукацыі, і ў міністэрства – паўсюль толькі паціскаюць плячыма. Таму і тэлефануе ў газэту.
11:16, 08/10/2002, "Белорусская газета"
Днямі “Белтрансгаз” плянуе падпісаць пагадненьне з трэцім аператарам прыроднага газу і тым самым разьвяжа гордзіевы вузел праблемаў, якія справакавалі сур’ёзны скандаль на міжнародным узроўні. Паводле інфармацыі крыніц, блізкіх да ўдзельнікаў перамоваў, гэта будзе афіліраваная з “Газпрамам” структура, якая раней не працавала на беларускім рынку.
11:15, 08/10/2002
Кіраўнікі прадпрыемстваў Магілёўскай вобласьці, якія дапусьцілі адставаньне ў росьце аб’ёмаў вытворчасьці ад адпаведнага ўзроўню мінулага году, могуць пазбавіцца сваіх пасад. Такую выснову можна зрабіць з заяваў старшыні Магілёўскага аблвыканкаму Барыса Батуры 7 кастрычніка на нарадзе ў аблвыканкаме.
11:14, 08/10/2002, "Белорусская газета"
Калі б ня цёплы дзень 30 верасьня, калі сярэднесутачная тэмпература паветра была вышэй за восем градусаў, у жылых дамах ужо б тапілі. Зрэшты, камунальшчыкі рады атрыманай адтэрміноўцы: кошты на мазут вырасьлі, а яго запасу ўсяго толькі на паўтара месяцы.
11:13, 08/10/2002
У Беларусі ў бліжэйшы час не чакаецца ніякіх зьменаў мытных пошлін на замежныя аўтамабілі, якія ўвозяцца ў краіну. Рэзкае павышэньне Расеяй з 1 кастрычніка мытных збораў на патрыманыя іншамаркі ніякім чынам не закране беларускіх аўтааматараў, падкрэсьліла ў размове з карэспандэнтам БЕЛТА прэсавы сакратар Дзяржмытні Беларусі Алена Халікава.
11:12, 08/10/2002
У адным з нумароў “АиФ” распавядаў пра тое, як беларускаму студэнту зьняць пакой ці кватэру. Але ёсьць яшчэ катэгорыя навучэнцаў – бедны студэнт. Чалавек з глыбінкі, які жыве (ці робіць спробы жыць) на стыпендыю. У такіх месца ў інтэрнаце, як правіла, ёсьць. Але нават квадратныя мэтры ў “общаге” ім не па кішэні.
11:11, 08/10/2002
Урады Кітаю, Кубы, Паўночнай Карэі, Вьетнаму, Лаосу і М’янмы зьяўляюцца самымі злоснымі парушальнікамі свабоды рэлігіі ў сьвеце. Такая выснова прагучала ў накіраваным у панядзелак у амэрыканскі кангрэс штогадовым дакладзе Дзярждэпартамэнту ЗША аб становішчы ў галіне свабоды вераспавяданьня ў розных краінах, перадае ИТАР-ТАСС. Сярод былых савецкіх рэспублік пад вострую крытыку трапіла Беларусь. Дзярждэпартамэнт лічыць, што нядаўна ейны парлямэнт “ухваліў адзін з самых рэпрэсіўных законаў аб рэлігіі ва ўсёй Эўразіі”.
11:10, 08/10/2002
Cупраць "Белорусской деловой газеты" пададзены чарговы судовы зыск, аўтар якога патрабуе спагнаць з выданьня 100 млн. рублёў (53 тысячы даляраў). Зыскоўцам выступае сёньняшні супрацоўнік АКБ "Белкоопбанк" Павал Дзік, які палічыў, што газэта і аўтар адной з публікацыяў Сергей Сацук зьняважылі ягоныя гонар, годнасьць і справавую рэпутацыю. Такім чынам, сёньня " БДГ" і ейны дадатак "Для служебного пользования" фігуруе адразу ў трох справах: 21-га кастрычніка ў судзе будзе разглядацца зыск пракурорскага сьледчага В.Цераховіча супраць журналісткі І.Макавецкай; акрамя таго, працягваецца сьледзтва па крымінальнай справе, заведзенай па факце публікацыі артыкулу І.Халіп "Афганские борзые".
11:09, 08/10/2002
Аляксандар Лукашэнка на кішынёўскім саміце выказаўся супраць пераабраньня на пасаду старшыні Рады кіраўнікоў дзяржаваў СНД, якую зараз займае прэзыдэнт Расеі Ўладзімер Пуцін, украінскага лідэра Леаніда Кучмы. Пра гэта ў панядзелак "Iнтэрфаксу" паведамілі ў прэсавай службе кіраўніка беларускай дзяржавы. Пры гэтым Лукашэнка падкрэсьліў, што “ этот вопрос не должен решаться спонтанно”. Нагадаем, што кандыдатуру Ўкраіны на пасаду старшыні СНД высунуў прэзыдэнт Расеі Ўладзімер Пуцін.
11:08, 08/10/2002
Іран выказаў згоду на далучэньне Рэспублікі Беларусь да Пагадненьня аб міжнародным транспартным калідоры “Поўнач- Поўдзень” (Фінляндыя – Індзія). Пра гэта БелаПАН паведаміла прэсавы сакратар Міністэрства транспарту й камунікацыяў Беларусі Эла Курыла. Паводле ейных словаў, дадзенае пытаньне абмяркоўвалася на сустрэчы міністра гандлю Ірана Махамада Шарыятмадары, якая адбылася ў канцы мінулага тыдня ў Менску. Падчас абмеркаваньня адзначалася, што Міністэрствам транспарту й камунікацыяў ужо падрыхтаваны праект пастановы Савету міністраў Беларусі аб далучэньні да згаданага пагадненьня.
11:07, 08/10/2002
Пасьля вяртаньня з паседжаньня Рады кіраўнікоў урадаў Садружнасьці Незалежных Дзяржаваў, якое адбылося 7 кастрычніка ў Кішынёве, прэм’ер-міністар Генадзь Навіцкі ідзе ў кароткатэрміновы адпачынак. Як паведаміў БЕЛТА прэсавы сакратар прэм’ер-міністра Іван Знаткевіч, кіраўнік ураду будзе адпачываць зь сям’ёй у Беларусі. Генадзь Навіцкі плянуе прыступіць да працы 17 кастрычніка.
11:06, 08/10/2002
Праблема ліквідацыі пазык па заробку разглядалася ў панядзелак на нарадзе ўраду. Пра гэта “Інтэрфаксу” паведамілі ў прэсавай службе Савету міністраў. Нараду правёў першы намесьнік прэм’ер-міністра Сяргей Сідорскі. У ёй удзел прымалі намесьнікі кіраўніка ўраду, кіраўнікі Міністэрства фінансаў, апарату Савету міністраў і шэрагу яго ўпраўленьняў. Пазыкі па заробку пераўзышлі 100 мільярдаў рублёў, што складае больш за 19 адсоткаў фонду заробку.
11:05, 08/10/2002, «Вечерний Минск»
Калі параўнаць Беларусь з суседкамі -- такімі ж брацкімі саюзнымі рэспублікамі, то мы здорава такі адстаем амаль ад усіх па ўзроўню разьвіцьця прыватнага бізнэсу. Так, у нас самы нізкі паказчык колькасьці дробных і сярэдніх прадпрыемстваў на адзінку насельніцтва (каля 2, на 1000 чалавек). Мы ж – адзіная краіна зь пераходнай эканомікай, дзе з 1999 году адзначаецца скарачэньне колькасьці прыватных ДП (26,8 на 1000 чалавек у 1999 годзе і 24,6 у студзені–чэрвені гэтага году). Прычым вельмі малая ўдзельная вага дробных прадпрыемстваў, занятых у прамысловасьці. І тут мы, паводле дадзеных Сусьветнага банку, знаходзімся на апошнім месцы і саступаем Літве, Латвіі, Грузіі, Казахстану, Украіне й Расеі.
11:04, 08/10/2002
У лідэрах па колькасьці беспрацоўных Віцебская, Магілёўская і Гомельская вобласьці. У бліжэйшы час спэцыялісты прагназуюць выбух беспрацоўя. Толькі ў Менску чакаюцца скарачэньні на больш чым 950 прадпрыемствах. Без працы, такім чынам, застануцца каля 10 тыс.чалавек.
11:03, 08/10/2002, "Белорусская газета"
Ідэалягічны міф аб поўнай працаўладкаванасьці Беларусі захіляе горкую праўду: з пачатку году афіцыйна зарэгістраванае беспрацоўе вырасла на 11,3%, а ў параўнаньні з аналягічным пэрыядам мінулага году – на 20%. Вымушаная няпоўная занятасьць толькі за сем месяцаў склала 431,2 тысячы чалавек, у той час як за ўвесь мінулы год было 461 тысяч. Пры захаваньні такіх тэмпаў росту колькасьці “лішкавых” людзей за ўвесь 2002 год, Беларусь згубіць 8,6 мільёнаў чалавека-дзён, што амаль на 30% больш, чым летась. Гэта эквівалентна штодзённаму нявыхаду на працу звыш 50 тысяч работнікаў.
11:02, 08/10/2002
З 1 студзеня 2003 году ўсталёўваецца сыстэма кантролю над увозам у Беларусь бензіну й дызельнага паліва з краін, зь якімі раней былі падпісаныя пагадненьні аб адмене мытнага кантролю. Адпаведны дэкрэт “Аб дадатковых мерах па барацьбе зь незаконным зваротам аўтамабільнага бензіну й дызельнага паліва ў Рэспубліцы Беларусь” падпісаў 7 верасьня Аляксандар Лукашэнка.
11:01, 08/10/2002
З 8 кастрычніка ў жылых дамах і адміністратыўных будынках Менску пачнуць уключаць ацяпленьне. Як паведаміў БелаПАН начальнік упраўленьня энэргетыкі й паліўных рэсурсаў Менгарвыканкаму Ўладзімер Дацэнка, штодзень у кожным раёне будзе падключацца па 20 адсоткаў жыльлёвага фонду з давядзеньнем тэмпературы ў кватэрах да 18 адсоткаў.
| |
|
, iнформэр
!["Вацлаў]("/g/allpics/stankevic_vaclov.jpg")
