Рэгіёны працягваюць забастоўку :: Хартыя'97 :: Навiны

Паводле дадзеных Аб’яднанага савету прадпрымальнікаў, агульнанацыянальная забастоўка прадпрымальнікаў працягваецца ў большасьці рэгіёнаў Беларусі.

Як паведаміў БелаПАН каардынатар Аб’яднанага савету прадпрымальнікаў Анатоль Шумчанка, па стану на 7 кастрычніка ў забастоўцы ўдзельнічаюць прадпрымальнікі шэрагу гарадоў Менскай вобласьці: Маладэчна, Вілейкі, Барысава, Крупак, Слуцка, Салігорску, Стаўбцоў, Узды, Дзяржынску, Фаніпалю, Валожына; у Віцебскай вобласьці бастуюць прадпрымальнікі Віцебску, Глыбокага, Ушачаў, Наваполацку й Полацку, Паставаў, Воршы, Міёраў; у Берасьцейскай -- Баранавічаў, Пінску й Ляхавічаў; у Гарадзенскай -- Горадні, Слоніму; у Гомельскай -- Рагачову, Сьветлагорску, Жлобіну.

У выходныя дні пачалі працу частка прадпрымальнікаў сталічных рынкаў “Дынама” і “Ждановічы”. Пры гэтым рынкі “Трактар” і “Чэрвенскі” працягвалі забастоўку. “Такім чынам, усе заявы ўладаў аб тым, што “забастоўка не адбылася”, “забастоўка правалілася” не адпавядаюць рэчаіснасьці”, -- адзначыў Шумчанка.

8 кастрычніка прадстаўнікі Аб’яднанага савету прадпрымальнікаў сустрэнуцца ў “палаце пардстаўнікоў” з “дэпутацкай” групай “Судзеяньне эканамічнаму разьвіцьцю” з мэтай вырашэньня праблем, якія ўзьніклі апошнім часам у сфэры малога бізнэсу Беларусі. 9 кастрычніка адбудзецца чарговае паседжаньне Каардынацыйнага камітэту АСП, на якім прадстаўнікі рэгіёнаў прааналізуюць сытуацыю, якая склалася падчас забастоўкі і прымуць праграму дзеяньняў на наступны пэрыяд.