Чэмпіёнка сьвету па веласпорту па-ранейшаму ня мае жыльля :: Хартыя'97 :: Навiны

Чатырохразовая чэмпіёнка па веласпорту Натальля Цылінская (раней, па мужу, Маркоўнічэнка) па-ранейшаму ня мае жыльля. Пра гэта было заяўлена 8 кастрычніка ў Менску на прэсавай канфэрэнцыі з удзелам спартсмэнкі і прадстаўнікоў Беларускай веласіпеднай федэрацыі. Мерапрыемства, арганізаванае Беларускай асацыяцыяй спартовай прэсы, было прысьвечана перамозе Н.Цылінскай у спрынце і гіце на 500 мэтраў на сусьветным першынстве ў Капенгагене (Данія) у канцы верасьня.

Паводле словаў старшыні Менскай гарадзкой веласіпеднай федэрацыі Ігара Скачкова, Міністэрства спорту й турызму адмовілася дапамагчы спартсмэнцы з набыцьцём жыльля ў сталіцы. Між тым менавіта кватэра была адной з умоваў, якія высунула спартсмэнка, калі ўвесну 2001 году паўстала пытаньне аб зьмене ёй грамадзянства. Вядомы расейскі спэцыяліст, трэнер Цылінскай Станіслаў Салаўёў прапанаваў ёй падумаць аб пераезьдзе ў Расею, улічваючы, што мэр Масквы Юры Лужкоў унёс прозьвішча веласіпедысткі ў сьпісы кандыдатаў на атрыманьне жыльля ў расейскай сталіцы. Міністар спорту й турызму Беларусі Яўген Варсін падчас асабістай сустрэчы са спартсмэнкай у красавіку мінулага году абяцаў ёй садзейнічаць у вырашэньні праблемы.

Паводле словаў прадстаўнікоў веласіпеднай федэраыі, сытуацыю, магчыма, зьменіць зварот да старшыні Менгарвыканкаму Міхаіла Паўлава. Спартсмэнка атрымала запэўніваньні ў тым, што к новаму году яна атрымае ключы ад трохпакаёвай кватэры плошчай 80 квадратных мэтраў у новым доме па вуліцы Магілёўскай. У наступныя гады сталічныя ўлады плянуюць выдаткоўваць па пяць кватэр для былых і дзейсных спартоўцаў, якія маюць патрэбу ў паляпшэньні жыльлёвых умоваў, пры будаўніцтве дамоў па лініі гарвыканкаму.

18 кастрычніка 27-гадовая Цылінская зноў зьбіраецца замуж. У гэты дзень яны адыграе ў Менску вясельле з 26-гадовым расейскім велагоншчыкам Андрэем Менашкіным.

“Я адсюль ня зьеду, пакуль мяне моцна не пакрыўдзяць”, -- заявіла чытырохразовая чэмпіёнка сьвету на прэсавай канфэрэнцыі.