Зубры памятаюць пра тых, хто іх вучыў :: Хартыя'97 :: Навiны

Пад такім дэвізам прайшла акцыя зуброў, прысьвечаная Дню настаўніка і жабрацкаму існаваньню ў нашай краіне прадстаўнікоў гэтай ганаровай прафесіі. У панядзелак на вуліцах гораду былі расклеяныя ўлёткі наступнага зьместу: “Малады настаўнік з вышэйшай адукацыяй з заробкам 57 тысяч рублёў у месяц (але з перабоямі), шукае новага прэызыдэнта”. Тым, хто зацікавіўся, прапаноўвалася далучацца да руху супраціву ЗУБР, каб дапамагчы выправіць такі стан рэчаў.

На наступны дзень – 7 кастрычніка - у некаторых школах Віцебску, а таксама на вуліцах можна было назіраць за цікавым відовішчам. Настаўнікі замацавалі да грудзей своеасаблівыя папяровыя шыльдачкі са словамі: “Прафэсія: настаўнік. Дата апошняга заробку: 1 ліпеня”. Так педагогі хадзілі на заняткі, так яны ішлі на працу і з працы.

Зьмест улётак заснаваны на рэальных фактах. Маладыя педагогі, насамрэч, атрымоўваюць каля 57 тысяч рублёў заробку, а ў некаторых школах Віцебску апошні раз заробак настаўнікі атрымалі 1 ліпеня.