Улада хавае інфармацыю пра стан “чарнобыльскіх” раёнаў :: Хартыя'97 :: Навiны

Саветам міністраў Рэспублікі Беларусь прынята пастанова, дзе цэлы шэраг населеных пунктаў Беларусі выведзеныя зь ліку небясьпечных у радыяцыйных адносінах, частка зь іх пераведзеная ў катэгорыю менш “брудных”. Усё гэта адбываецца на фоне бадзёрых і аптымістычных заяваў урадавых чыноўнікаў, “аб’ектыўных” навукоўцаў і работнікаў міністэрства аховы здароўя аб тым, што наступствы Чарнобыльскай катастрофы мінімізуюцца і ўсё больш тэрыторый вяртаюцца да нармальнага жыцьця. Аднак, непрадузятыя дадзеныя, лісты і звароты грамадзян гэтых населеных пунктаў кажуць пра іншае.

Рост захворваньняў, асабліва дзіцячых, высокая сьмяротнасьць сярод людзей працаздольнага ўзросту, на фоне нізкага заробку і даходаў, роста беспрацоўя ставіць насельніцтва гэтых тэрыторый на мяжу выжываньня.

На жаль, замежная палітыка, якая праводзіццца кіраўніцтвам Беларусі, уведзеныя заканадаўчыя і нарматыўныя акты прывялі да значнага скарачэньня гуманітарнай дапамогі з боку разьвітых краін Захаду. Усё цяжэй яе ажыцьцяўляць і грамадзкім арганізацыям.

Свабодны прафсаюз Беларускі з мэтай абароны правоў і інтарэсаў сябраў прафсаюзу, усіх грамадзян, якія пражываюць у дадзеных рэгіёнах запатрабаваў ад кіраўніцтва краіны зьняць завесу закрытасьці ад шырокай грамадзкасьці і агучыць аб’ектыўную інфармацыю аб стане здароўя насельніцтва, правесьці сур’ёзныя эпідэміялягічныя дасьледаваньні, як гэта робіцца ў Украіне і Расеі. “Неабходна адмяніць пастанову Савміну №1076, зьняць штучныя перашкоды для грамадзкіх арганізацыяў, якія ажыцьцяўляюць супрацоўніцтва ў гуманітарнай сфэры”, -- гаворыцца ў заяве прэзыдуюму Савету Свабоднага прафсаюза Беларускага.