БЕЛАРУСЫ БОЛЬШ НЕ БАЯЦЦА НАТА І ЖАДАЮЦЬ У ЭЎРОПУ :: Хартыя'97 :: Навiны

Цікавыя дадзеныя былі прадстаўленыя сёньня на чарговым штоквартальным брыфінгу Беларускіх фабрык думак, дзе разглядаліся палітычныя, эканамічныя і сацыяльныя вынікі трэцяга кваталю 2002 году. Згодна вынікам сацыялягічных дасьсьледаваньняў НІСЭПД, за аб’яднаньне Беларусі й Расеі выступілі 53,8 адсоткаў беларусаў. За ўступленьне Беларусі ў Эўразьвяз на гіпатэтычным рэферэндуме прагаласавалі б 53,4 адсоткі беларускіх грамадзян. Акрамя таго, у Беларусі відавочны рост празаходніх настрояў. Колькасьць людзей, якія лічаць, што пашырэньне НАТА не нясе пагрозу Беларусі, з 1999 году павялічылася больш чым у два разы. Пры гэтым ідэю Пуціна па інкарпарацыі Беларусі падтрымлівае ўсяго 32,3% беларускіх грамадзян – астатнія супраць або пакуль устрымліваюцца.

Табліца 1

Разьмеркаваньне адказаў на пытаньне “Калі б заўтра адбыўся рэферэндум аб уступленьні Беларусі у Эўразьвяз, як бы Вы прагаласавалі?” (верасень 2002 году)

Варыянт адказу	%
За	53,4
Супраць	8,1
Ня стаў бы галасаваць	13,0

Табліца 2*

Дынаміка разьмеркаваньня адказаў на пытаньне “Калі б сёньня праходзіў рэферэндум аб аб’яднаньні Беларусі й Расеі, як бы Вы прагаласавалі?”,%

Варыянт адказу	03’99	04’00	04’01	04’02
За аб’яднаньне	41,8	55,7	56,6	53,8
Супраць аб’яднаньня	40,4	27,6	28,4	23,0
Не прымаў бы ўдзел ў галасаваньні	14,7	15,6	14,6	11,6

*Дадзеныя за верасень НІСЭПД тут не падае

Табліца 3

Разьмеркаваньне адказаў на пытаньне: “Расейскі прэзыдэнт прапанаваў таксама ўвесну 2003 году правесьці рэферэндум па пытаньні: “Ці згодны Вы, што Расея й Беларусь аб’яднаюцца ў адзіную дзяржаву на аснове наступных прынцыпаў:

а ) забесьпячэньне роўнасьці правоў і свабод грамадзян аб’яднанай дзяржавы
б) равенства рэгіёнаў Расейскай Федэрацыі й Беларусі як суб’ектаў адзінай дзяржавы
в) стварэньне адзіных органаў улады ў адпаведнасьці з Канстытуцыяй Расейскай Федэрацыі?”.

Калі такі рэферэндум адбудзецца, як Вы будзеце галасаваць?” (верасень 2002 году)

Варыянт адказу	%
Адкажу, што згодны	32,3
Адкажу, што ня згодны	26,3
Пакуль яшчэ ня ведаю, пагляджу па абставінах	31,7
Ня буду прымаць удзел у такім рэферэндуме	8,0

Табліца 4

Дынаміка разьмеркаваньня адказаў на пытаньне: “Ці прадстаўляе пашырэньне НАТА пагрозу для Беларусі?”, %

Варыянт адказу	06’99	11’99	04’01	09’02
Не	17,6	20,2	23,5	41,2
Так	47,7	43,7	36,8	31,3

Вынiкi дасьледаваньня НІСЭПД камэнтуе каардынатар Хартыі’97 Зьміцер Бандарэнка:

“Дадзеныя паказчыкі сьведчаць аб тым, што беларусаў, якія выступаюць за ўступленьне Беларусі ў Эўразьвяз практычна столькі сама, колькі жадае аб’яднаньня з Расеяй. Гэтыя дадзеныя можна назваць сэнсацыйнымі, бо за апошнія дзесяць гадоў беларускія дзяржаўныя СМІ нагняталі антызаходнюю гістэрыю і, як і расейкія тэлеканалы, праводзілі кампанію, накіраваную на аб’яднаньне Расеі й Беларусі. Прыхільнікі лёзунгу “Беларусь у Эўропу”, безумоўна, такой магчымасьці ня мелі.

На брыфінгу Фабрык думак некаторыя ўдзельнікі актыўна прасоўвалі лёзунг “Разам Расеяй у Эўропу”. На мой погляд, насамрэч існуе толькі два шляхі “Беларусь у Эўропу” ці “Беларусь у Расею”. Тэза “Разам з Расеяй у Эўропу” надзвычай небясьпечная і безвыніковая, бо любая палiтычная інтэграцыя з усходнім суседам будзе азначаць для нашага народу страту дзяржаўнасьці. І гэта не хаваюць ні прэзыдэнт Пуцін, ні іншыя расейскія кіраўнікі. Але, нягледзячы на папулярнасьць Пуціна ў Беларусі, як паказваюць дадзеныя соцапытаньняў, яго ідэю ўступленьня Беларусі ў склад Расейскай федэрацыі не падтрымліваюць.

Вынiкi дасьледаваньня кажуць пра рост празаходніх настрояў, а колькасьць прыхільнікаў аб’яднаньня з Расеяй за апошнія два гады нават некалькі зьнізілася”.