Расейскія й беларускія вайскоўцы дамаўляюцца :: Хартыя'97 :: Навiны

Пытаньні разьвіцьця нарматыўна-прававой базы ваенна-тэхнічнага супрацоўніцтва Расеі й Беларусі, устанаўленьне ільготнага рэжыму нетарыфнага рэгуляваньня адносна прадукцыі ваеннага прызначэньня, якая перавозіцца паміж двума краінамі, абмяркоўваліся на першым паседжаньні міжурадавай камісіі па ваенна-тэхнічным супрацоўніцтве 2 кастрычніка.

Як паведамілі карэспандэнту РІА "Новости" у чацьвер у дэпартамэнце інфармацыі Сталага камітэту “саюзнай дзяржавы” Расеі й Беларусі, абмяркоўваліся таксама роўныя ўмовы гаспадараньня для юрыдычных асоб дзьвюх краін, якія ўдзельнічаюць у распрацоўцы, вытворчасьці, рамонце й мадэрнізацыі прадукцыі ваеннга прызначэньня.

Нагадаем, што зараз ваенна-тэхнічнае супрацоўніцтва Расеі й Беларусі рэгулюецца чатырма міжурадавымі і адным міждзяржаўным пагадненьнем. Ваеннае супрацоўніцтва (сумесныя баявыя дзяжурствы, сумесныя навучаньні) дзьвюх краін апярэджвае ваенна-тэхнічнае. Аб’ёмы ўзаемадзеяньня тут мінімальныя, а праект дамовы аб сумесным абаронным заказе яшчэ толькі распрацоўваецца.

Зрэшты, тэмпы ваенна-тэхнічнага супрацоўніцтва шмат у чым залежаць ад мадэлі далейшай інтэграцыі, якой аддадуць перавагу палітыкі абедзьвюх дзяржаваў, адзначылі ў дэпартамэнце інфармацыі Сталага камітэту.