Так ці праходзяць кансультацыі паміж Беларусяй і АБСЭ? :: Хартыя'97 :: Навiны

Прэсавы сакратар Міністэрства замежных справаў Беларусі Павел Латушка на ўчорашнім брыфінгу аб’явіў пра пачатак кансультацыяў паміж сталымі прадстаўнікамі Беларусі й Партугаліі ў АБСЭ. Ён паведаміў, што беларускі пасол Віктар Гайсёнак сустрэўся з прадстаўнікамі Сакратарыяту АБСЭ і Дзейсным старшынём арганізацыі. Між тым прэсавы сакратар партугальскага прадстаўніцтва ў АБСЭ Антоніа Капінья гэтую інфармацыю не пацьвердзіў. “Я ня маю такой інфармацыі і не магу пацьвердзіць такія перамовы. Пазыцыя Партугаліі ў тым, што яна чакае, калі ўлады Беларусі зробяць канкрэтныя прапановы. Ёсьць намеры – калі ня будзе ніякага разьвіцьця – падняць гэтае пытаньне на наступнай Сталай радзе”, -- заявіў у інтэрвію Радыё Свабода партугальскі дыплямат.

Антоніа Капінья дадаў, што на ўчорашнім паседжаньні Сталай рады АБСЭ беларускае пытаньне прадстаўнікі дзейснага старшыні не закраналі.

Нагадаем, што на дадзены момант у створанай у 1997 годзе з рашэньня АБСЭ для судзеяньня ў разьвіцьці дэмакратычных інстытутаў у Беларусі і назіраньня за выкананьнем ёй сваіх абавязацельстваў у рамках Кансультатыўна-назіральнай групы застаўся толькі адзін замежны супрацоўнік. Гэта прадстаўнік Малдовы Аліна Жасан, у якой тэрмін дзеяньня візы сыходзіць 29 кастрычніка. Астатнім членам групы, у якіх тэрмін візы сышоў раней, беларускія ўлады адмовілі ў іх падоўжэньні, бо афіцыйны Менск лічыць, што КНГ АБСЭ злоўжывае сваімі паўнамоцтвамі і ўмешваецца ва ўнутраныя справы краіны, рэгулярна падтрымоўваючы апазыцыю.