Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Вядомы беларускі журналіст і праваабаронца Валеры Шчукін зьвярнуўся ў ГУУС Менгарвыканкаму са скаргай на неправамоцныя дзеяньні службовых асоб Першамайскага РАУС Менску. 11 верасьня каля будынка суда Першамайскага раёну Менску, дзе праходзіў суд над рэдактарам газэты “Рабочы” Віктарам Івашкевічам, Валеры Шчукін быў зьбіты трыма невядомымі людзьмі ў штацкім. Пасьля таго, як за журналіста заступіліся прысутныя ў судзе грамадзяне, правапарушальнікі схаваліся за сьпіны службовых асоб Першамайскага РАУСу, якія заявілі, што гэтыя людзі – супрацоўнікі міліцыі. Пасьля гэтага Шчукін зьвярнуўся з просьбай разабрацца пра здарэньне да старшыні раённага суда й начальніка Першамайскага РАУС. Аднак старшыня суда ад разгляду здарэньня ўхіліўся, а начальнік РАУС заявіў, што падчас праверкі выкладзеныя журналістам факты свайго пацьверджаньня не знайшлі.
У банкаўскай сыстэме краіны новы скандал. Супрацоўнікі Ўпраўленьня Камітэту па барацьбе з арганізаванай злачыннасьцю й карупцыяй (УКБАЗіК) МУС РБ па г.Менску затрымалі першага намесьніка старшыні праўленьня банка ААТ “Банк “Залаты талер” Зьмітра Міхалевіча. Яму інкрымінуецца атрыманьне буйнога хабару за незаконную падачу замежнаму грамадзяніну фінансавых дакумэнтаў. За гэты год гэта ўжо другая справа, распачатая адносна службовых асоб “GT”, як яшчэ называюць гэты банк.
У суботу актывісту руху ЗУБР Андрэю Зайцаву, даведзенаму да самазабойства супрацоўнікамі КДБ, споўнілася б 25 гадоў. Гомельскія зубры правялі некалькі акцыяў, якія нагадалі гараджанам пра гэта злачынства рэжыму. Вечарам 11 кастрычніка па ўсіх маршрутах грамадзкага транспарту і іншых людных месцах былі расклеяны некалькі сотняў партрэтаў Андрэя за подпісам: “Андрэй Зайцаў. Актывіст руху ЗУБР. Даведзены да самазабойства супрацоўнікам КДБ. 12 кастрычніка яму споўнілася б 25 гадоў...”.
Кіраўніцтва Нацыянальнай акадэміі навук Беларусі (НАНБ) рэкамендавала супрацоўнікам акадэміі ахвяраваць месячны службовы аклад на будаўніцтва Нацыянальнай бібліятэкі. Пра гэта гаворыцца ў пастанове “Аб арганізацыі грамадзкага руху па збору сродкаў на будаўніцтва будынка Нацыянальнай бібліятэкі Беларусі”, прынятым Бюро прэзыдуюму НАНБ.
Прайграная вайна 11:21, 14/10/2002, Фрыдэман Вэкбах-Мара, “Die Welt”
Канфідэнцыяльныя дакумэнты з адміністрацыі федэральнага канцлера даказваюць: Расея вядзе безнадзейную барацьбу зь паўстанцамі ў Чачэніі.
Паміж Беларусяй і Вьетнамам склаліся добрыя палітычныя й дыпляматычныя зносіны, пад якія неабходна ствараць “мощную базу торгово-экономического сотрудничества”. Пра гэта заявіў у панядзелак у Менску Аляксандар Лукашэнка падчас сустрэчы з генэральным сакратаром кампартыі Вьетнаму Нонг Дык Манем, які прыбыў у Беларусь зь візытам, паведамляе "Медиафакт". Паводле словаў Лукашэнкі, беларускі бок гатовы ісьці на “льготное налогообложение для Вьетнама, на создание совместных предприятий и даже готова продать часть акций белорусских заводов, которые сегодня работают на вьетнамском рынке”. У прыватнасьці, размова можа ісьці аб менскім мотавелазаводзе, прадукцыя якога карыстаецца вялікай папулярнасьцю ва Вьетнаме, удакладніў Лукашэнка.
Заканадаўчая асамблея кыргызскага парлямэнту ўзялася за распрацоўку законапраекту аб уступленьні Кыргыстана ў “саюзную” дзяржаву Расеі й Беларусі. Ініцыятыва аб больш цесных зносінах паміж Кіргізіяй і Расеяй упершыню была высунутая кіргізскімі парлямэнтарамі ў 1998-ым годзе, але тады гэтае пытаньне не было вынесенае нават на абмеркаваньне. Зараз Кыргыстан, які перажывае востры эканамічны й палітычны крызыс, вырашыў перагледзіць сваю пазыцыю. Паводле ўжо вызначанага графіка Жогорку Кенэша, заканадаўчая асамблея парлямэнту павінна падаць дэпутатам законапраект аб далучэньні Кыргізіі да “саюзнай” дамовы паміж Расеяй і Беларусяй ужо да канца кастрычніка.
У Гаспадарчы суд Гомельскай вобласьці паступіла заява крэдытора – таварыства з абмежаванай адказнасьцю “Тетракамплект” з Санкт-Пецярбургу аб прызнаньні банкрутам рэспубліканскага ўнітарнага прадпрыемства “Гомельскі завод сельскагаспадарчага машынабудаваньня “Гомсельмаш”.
Гэтымі днямі аграрыі зноў абмяркоўваюць тэму ліцэнзаваньня імпарту мукі. Маўляў, танная расейская, што як хваля зыхлынула Беларусь, пагражае спыніць беларускіх млыноў. Праблема хутка будзе разглядацца ва ўрадзе. І ня выключана, што ўжо ў гэтым месяцы паступленьне імпарту рэзка зьменіцца. Айчынныя мукамолы, безумоўна, выйграюць. Аднак чым гэта абернецца для шэраговых грамадзян, нас з вамі, якія прывыклі да таго, каб сьвежы хлеб быў на стале кожны дзень?
Многія жыхары памежных з Расеяй Касьцюковіцкага, Крычаўскага й Клімавіцкага раёнаў ужо і забылі, як выглядаюць мясцовыя харчовыя крамы, - усе прадукты набываюць у суседняй дзяржаве і вязуць іх дадому для ўласнага спажываньня й перапродажу.
Разьлікі Беларусі за газ з расейскім канцэрнам “Газпром” трактарамі, тэлевізарамі, лядоўнямі ды іншымі так званымі ліквіднымі таварамі сёлета пачаліся незвычайна позна — аж у сярэдзіне верасьня. “Пераварыць” такія велізарныя аб’ёмы да канца году, як сьцьвярджаюць эканамісты, немагчыма. А гэта азначае, што запазычанасьць Беларусі на 1 студзеня 2003 году за выкарыстаны газ значна ўзрасьце.
Міністэрства фінансаў Расеі мае намер скараціць долю РФ у бюджэце “саюзнай дзяржавы” на 2003 год. Пра гэта на прэсавай канфэрэнцыі ў Менску 11 кастрычніка распавёў намесьнік старшыні камітэту Савету Федэрацыі па справах Садружнасьці Незалежных Дзяржаваў Леанід Лушкін. Гэта, паводле ягоных словаў, высьвятлілася падчас нядаўняга паседжаньня камітэту, на якім абмяркоўваўся наступны “саюзны” бюджэт. Сваё рашэньне расейскі ўрад матывуе, у тым ліку і тым, што беларускі бок цягам апошніх гадоў хранічна не выконвае свае абавязацельствы перад бюджэтам “саюзнай дзяржавы”, і на сёньня яе запазычанасьць склала каля 1 мільярда расейскіх рублёў.
Беларусь ніколі не падтрымае самавольныя дзеяньні ЗША адносна Ірака. Пра гэта заявіў на прэсавай канфэрэнцыі ў пятніцу старшыня камісіі Парлямэнцкага сходу Беларусі й Расеі па пытаньнях замежнай палітыкі, кіраўнік камісіі Савету Рэспублікі “нацыянальнага сходу” Беларусі Мікалай Чаргінец.
Украінскія ўлады дэманструюць поўную адкрытасьць і гатоўнасьць супрацоўнічаць зь міжнароднымі праверкамі. Прэзыдэнт Кучма даў распараджэньне ўсялякім чынам ім дапамагаць і стварыў для гэтага адмысловую камісію. Ваеннаначальнікі заяўяюць, што з задавальненьнем пакажуць экспэртам усе "Кальчугі" на ўкраінскай зямлі, а таксама запрашаюць іх на завод “Топаз”, дзе вырабляюць гэтыя сыстэмы. Аднак апазыцыя папярэджвае, што замежным спэцыялістам пакажуць інсцэніроўку – маўляў, комплексы, якіх не хапае, бо прададзеныя Іраку насуперак санкцыям ААН, пазычылі ў Беларусі. Беларускія ўлады гэта адмаўляюць і, у сваю чаргу, прапаноўваюць палічыць іх "Кальчугі".
У выніку ваеннай апэрацыі супраць Ірака ЗША маюць намер зьбіць кошты на нафту да 13 даляраў за барэль, а ўрон эканамічным інтарэсам Расеі будзе значна большым, чым прагназавалася ў друку. Пра гэта, як перадае РIА «Новости», паведаміла ў пятніцу дзелавая інтэрнэт-газэта "Asia Times", якая выдаецца ў Ганконгу і зьяўляецца адным з галоўных азіяцкіх выданьняў такога роду.
Ігар Аксёнчык, адвакат сям’і Зьмітра Завадзкага, засуджаны на 1 год і 6 месяцаў зьняволеньня з прызначэньнем тэрміну выпрабаваньня на два гады. Такое рашэньне вынес учора суд Ленінскага раёну Менску. Згодна прысуду судзьдзі Валянціны Крывой Ігар Аксёнчык асуджаны за распаўсюд у сродках масавай інфармацыі “ілжывых і паклёпніцкіх выдумак адносна генэральнага паркурора Беларусі Віктара Шэймана”. Разгляд “справы Аксёнчыка” праходзіў на закрытым судовым паседжаньні.
Аляксандар Лукашэнка сустрэўся зь генэральным пракурорам Беларусі Віктарам Шэйманам. Падчас размовы генпракурор даклаў кіраўніку беларускай дзяржавы аб стане законнасьці й правапарадку ў краіне, выніках працы, зробленай органамі пракуратуры за мінулы тыдзень. Як паведамілі "СОЮЗ-ИНФО" ў прэсавай службе Лукашэнкі, Шэйман таксама праінфармаваў аб сканчэньні расьсьледаваньня крымінальнай справы, распачатай да шэрагу кіраўнікоў Фонду прэзыдэнцкіх праграм. Яны абвінавачваюцца ў злоўжываньні службовым становішчам. Паводле вынікаў сьледзтва крымінальная справа накіраваная ў суд.
Лідэр Федэрацыі прафсаюзаў рэспублікі (ФПБ) Леанід Козік, які раней займаў пасаду намесьніка кіраўніка адміністрацыі прэзыдэнта, вызвалены ад абавязкаў сустаршыні Міжурадавай беларуска-ірацкай камісіі па гандлёва-эканамічным супрацоўніцтве. Як паведамілі "Интерфаксу" крыніцы ва ўрадавых колах, адпаведная пастанова прынятая беларускім урадам. Пытаньне аб пераемніку Козіка на дадзенай пасадзе, паводле інфармацыі крыніц, пакуль канчаткова ня вырашанае.
Хлебам-сольлю сустрэлі ў Нацыянальным аэрапорце “Менск” генэральнага сакратара Кампартыі Вьетнаму Нонг Дык Маня, які прыбыў у нядзелю ў Беларусь з трохдзённым афіцыйным візытам. Як перадае карэспандэнт РIА «Новости», высокага госьця сустракалі першы віцэ-прэм’ер ураду Беларусі Сяргей Сідорскі, міністар замежных справаў Міхаіл Хвастоў, шэраг іншых афіцыйных асоб.
Аляксандар Лукашэнка ў чарговы раз пачаў нацыянальную кампанію па добраахвотна-прымусоваму збору грошай на нацыянальную будоўлю. На гэты раз у цэнтры Менску зьбіраюцца ўзводзіць новы будынак Нацыянальнай бібліятэкі, паведамляе сайт тэлеканалу "REN TV".
У сувязі з тым, што ў сродкі масавай інфармацыі паступае шмат зваротаў грамадзян са скаргамі на парушэньне рэжыму трансьляцыі тэлеканалаў "Россия", "НТВ" і "Культура", Белтэлерадыёкампанія распаўсюдзіла афіцыйную заяву.
Разьвітыя заходнія краіны павінны кампэнсаваць “уцечку мазгоў” зь Беларусі. Пра гэта, як паведамляе “Медиафакт”, заявіў на 3-яй Міжнароднай навуковай канфэрэнцыі “Праблемы прагназаваньня й дзяржаўнага рэгуляваньня сацыяльна-эканамічнага разьвіцьця” прэзыдэнт Нацыянальнай акадэміі навук, экс-кіраўнік адміністрацыі прэзыдэнта Беларусі, Міхаіл Мясьніковіч.
За першае паўгодзьдзе гэтага году ў эканоміку Беларусі прыцягнута замежных інвэстыцыяў на суму ў 46,4 мільёны даляраў ЗША. Як паведамілі карэспандэнту БЕЛТА ў Міністэрстве замежных справаў нашай краіны, за шэсьць мінулых месяцаў у рэспубліцы зарэгістравана 332 камэрцыйныя арганізацыі з замежнымі інвэстыцыямі. Гэта на 11 меней у параўнаньні з аналягічным пэрыядам мінулага году, аднак, статутны фонд зноў створаных прадпрыемстваў павялічыўся на 11 адсоткаў і склаў 26,5 мільёны даляраў. Тэндэнцыя росту зарэгістраваных камэрцыйных арганізацыяў са 100-адсоткавым замежным капіталам захоўваецца.
Колькасьць вакансіяў у Беларусі штомесяц зьніжаецца. На 1 кастрычніка гэтага году ў банку дадзеных дзяржаўнай службы занятасьці іх зарэгістравана трошкі болей за 33 тысячы. Зь іх кожная трэцяя - на прадпрыемствах і арганізацыях сталіцы. А менш за ўсё свабодных працоўных месцаў у Магілёўскай і Гарадзенскай абласьцях. Як паведамілі БЕЛТА ў Дэпартамэнце па працаўладкаваньні Міністэрства працы й сацыяльнай абароны, амаль 85 адсоткаў ад агульнай колькасьці вакансіяў - па рабочых спэцыяльнасьцях. У агуле па рэспубліцы на кожнае свабоднае працоўнае месца сёньня прыпадае 4 беспрацоўныя - удвая болей за мінулы год.
, iнформэр
